EUÝ rektory jemqorlyqpen kúres sharalary týraly aıtyp berdi

NUR-SULTAN. QazAqparat - L. N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov oqý ornyndaǵy sybaılas jemqorlyqpen kúres sharalary týraly aıtyp berdi, dep habarlaıdy QazAqparat tilshisi.

«Sybaılas jemqorlyqpen qarsy kúres agenttigi «Adaldyq alańdaryn» ashý týraly bastama kótergen edi. Ony Bilim jáne ǵylym mınıstrligi alǵashqylardyń biri bolyp qabyldap, «Adal bilim» jobasyn bastady. «Adal bilim» keńseleri barlyq oqý oryndarynda ashyla bastady. Biz óz ortalyǵymyzdy «Ádep» dep atadyq, ony Zań ǵylymdarynyń kandıdaty, oqytýshy Erkebulan Nuǵymanov basqarady», - dedi rektor Sybaılas jemqorlyqqa qarsy qyzmettiń ANTIKOR ortalyǵynda ótken suhbatta.

Ortalyq stýdentteri sybaılas jemqorlyqtyń aldyn alý úshin júıeli túrde jumys istep keledi. Olar stýdentter arasynda anketa, áleýmettik saýalnama júrgizip, taldaý jasaıdy. Stýdentter shaǵymyn anonımdi túrde qabyldaıdy.

«Eger bir oqytýshynyń aty-jóni birneshe ret qaıtalansa, sol oqytýshymen jumys isteımiz. Keıbiri moıyndaıdy, keıbiri stýdentterdiń synyn qabyldap, jumystan shyǵyp ketedi. Men 10 jylǵa jýyq osy ýnıversıtettiń jetekshisi bolyp otyrmyn jáne bul jyldary bizde jemqorlyqpen sottalý oqıǵasy bolǵan joq. Árıne, jemqorlyqty túbirimen jeńdik dep aıta almaımyz, degenmen kúdik týyndaǵan bastapqy kezde-aq mamandarmen sóılesemiz, sóılesý múmkin bolmasa, ondaı qyzmetkerdi jumystan shyǵaramyz», - dedi E. Sydyqov.

Aıta keteıik, buǵan deıin EUÝ rektory 2,5-3 myń oryndyq jańa jataqhana qurylysy bastalǵanyn habarlaǵan edi.