EUÝ QS World University Rankings-tiń «Fızıka» baǵyty boıynsha úzdik JOO-lar qataryna endi
ASTANA. QazAqparat - 8 naýryz kúni QS World University Rankings by Subject jyl saıynǵy reıtınginiń nátıjesi jarııalandy. Bul pándik reıtıngte Astanadaǵy L.N. Gýmılev atyndaǵy Eýrazııa ulttyq ýnıversıteti «Fızıka» boıynsha atalmysh baǵyt júzege asyrylatyn 1 110 JOO qatarynan kórindi.
Baǵyttardy baǵalaý akademııalyq sarapshylar men jumys berýshilerdi saýalnamalaý nátıjesi, dáıeksóz alý men Hırsh ındeksi negizinde júzege asyryldy.
Bıyl reıtıngte EUÝ alǵash ret bilim berý salasy boıynsha 6 baǵytty qamtydy: «Fızıka jáne astronomııa», «Óner jáne dızaın», «Matematıka», «Ekonomıka jáne ekonometrııa», «Qonaq úı menedjmenti», «Áleýmettik saıasat jáne basqarý».
Atap ótetin jaıt, qazaqstandyq JOO-lar arasynda QS World University Rankings by Subject nusqasy boıynsha Eýrazııa ulttyq ýnıversıteti «Fızıka», «Óner jáne dızaın», «Matematıka», «Qonaq úı menedjmenti (Týrızm)» baǵyttary alǵashqy orynǵa ıe boldy. «Ekonomıka jáne ekonometrııa» ІІ orynǵa taban tiredi. Sonymen qatar «Fızıkadan» basqa 2017 jyly QS World University Rankings by Subject reıtıngisine engizý men saralaý úshin kórsetilgen baǵyttardyń shektik baly jetkiliksiz boldy.
«L.N. Gýmılev atyndaǵy EUÝ álemdik bilim berý keńistiginde ýnıversıtetti alǵa jyljytý boıynsha maqsatty túrde jumys isteýde. Bilim ordamyzdyń «Fızıka» baǵytynyń úzdikterdiń qataryna qosylǵandyǵynyń ózi bir jetistik, demek, Qazaqstan JOO-lary básekege qabiletti fızık mamandaryn daıarlaıdy degen sóz. Dál osyndaı mindet L.N. Gýmılev atyndaǵy EUÝ-diń basqa da baǵyttarynyń aldynda tur. Sondyqtan biz álemdik naryqta sapa men mamandarymyzdyń bedelin arttyrý maqsatynda álemdik reıtıngtik agenttikterde úzdikterdiń qatarynan kórinýge barynsha talpynyp, ózge de salalardy keńinen qamtýǵa bar kúsh-jigerimizdi salatyn bolamyz», - dep atap ótti Eýrazııa ulttyq ýnıversıtetiniń rektory, QR UǴA akademıgi Erlan Sydyqov.
Jalpy QS álemniń 4 438 JOO-synda 46 baǵytty qarastyrdy. Onyń ishinde ár túrli bilim berý salasy boıynsha reıtıngke tek 1 117 JOO engen.
Aıta keteıik, buǵan deıin habarlaǵanymyzdaı , búgin Memleket basshysy Nursultan Nazarbaev L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqovty qabyldaǵan bolatyn.
