EUÝ professorlary sporttyń 12 túri boıynsha saıysqa tústi
ASTANA. 9 qańtar. QazAqparat - Astanada «Eýrazııa» sport kesheninde «Sergektik pen densaýlyq» atty spartakıada bastaldy.
Jarys ústel tennısi, toǵyzqumalaq, shahmat, shańǵy jarysy, voleıbol, shaǵyn fýtbol, bılıard, arqan tartý, gir kóterý, qol kúresi, sporttyq balyq aýlaý syndy sporttyń 12 túri boıynsha ótti. Oǵan L.N.Gýmılev atyndaǵy Eýrazııa ulttyq ýnıversıtetiniń oqytýshy-professorlyq quramy men ýnıversıtet qyzmetkerleri qatysýda.
Uıymdastyrýshylardyń aıtýynsha, osyndaı deńgeıdegi sharalardy ótkizý ýnıversıtet úshin dástúrge aınalǵan. JOO aımaǵynda 20 sport túri boıynsha sektsııalar jumys jasaýda. Jyl saıyn stýdentter men ustazdar arasynda spartakıadalar uıymdastyrylady. Al stýdentterge sportpen erkin shuǵyldanyp, halyqaralyq jarystarǵa shyǵý múmkindigi jasalǵan. Este bolsa, 14-17 qarasha aralyǵynda Latvııada ótken gir kóterýden álem chempıonatynda Eýrazııa ulttyq ýnıversıteti fılologııa fakýltetiniń 4 kýrs stýdenti Azat Tursyn ІІ oryndy ıelenip, kúmis júldeni qanjyǵasyna baılap qaıtqan edi.
«Sergektik pen densaýlyq» atty spartakıada 30 qańtarǵa deıin jalǵasady.
