EUÝ Prezıdent N.Nazarbaevtyń ókilettiligin uzartýdy qoldaıdy
ASTANA. 31 jeltoqsan. QazAqparat - Lev Gýmılev atyndaǵy Eýrazııa ulttyq ýnıversıtetinde rektor B.Ábdiraıymnyń bastamasymen referendýmǵa qatysty alqaly jıyn ótti.
Basqosýda Prezıdentimizdiń jasap jatqan ıgi isteri men Qazaqstandaǵy tynyshtyq pen beıbitshilik, ózge ult ókilderimen qazaq halqynyń dostyq qarym-qatynasy, bilim men ǵylym salasynyń damýyna kórsetip jatqan erekshe qoldaýy áńgime ózegine aınaldy, dep habarlaıdy ýnıversıtettiń baspasóz qyzmeti..
Eń bastysy, N.Nazarbaevtyń halyqaralyq arenadaǵy orny men bedeli, el basqarýdaǵy kóshbasshylyǵyn rektor B.Ábdiraıym erekshe atap ótti. EUÝ-dyń oqytýshy-professorlary, doktoranttary men magıstranttary Ult kóshbasshysy N.Nazarbaevtyń ókilettiligin uzartýdy qoldaıtyndyqtaryn bildirdi, nátıjesinde belsendi jumys toptary árbir fakýltetterde qurylyp, atalǵan bastamany qoldaý jumystaryn júrgizýdi bastap ketti.
L.Gýmılev atyndaǵy Eýrazııa ulttyq ýnıversıteti - Prezıdent N.Nazarbaevtyń qoldaýymen elimizdegi bilim men ǵylymdy damytý maqsatynda qurylǵan Qazaqstandaǵy eń úzdik irgeli joǵary oqý oryndarynyń biri. Oqý ornynyń álemdegi eń úzdik 500 ýnıversıtettiń qatarynan kórinip, halyqaralyq dárejede, sondaı-aq otandyq ǵylym men bilimdi damytýda jetken jetistikterin EUÝ ujymy sózsiz Elbasynyń sarabdal saıasatymen baılanystyrady. Sondyqtan, Lev Gýmılev atyndaǵy Eýrazııa ulttyq ýnıversıtetiniń ujymy men oqytýshy-professorlary jáne stýdentter quramy Prezıdent N.Nazarbaevtyń ókilettiligin 2020 jylǵa deıin uzartýdy bir aýyzdan qoldaıdy.
