EUÝ halyqaralyq QS World University Ranking 2016 reıtınginde 26 orynǵa joǵarylady
ASTANA. QazAqparat - L.N.Gýmılev atyndaǵy Eýrazııa ulttyq ýnıversıteti álemdik bilim naryǵynda básekege qabiletti ekendigin taǵy da dáleldep, álemdegi úzdik 900 ýnıversıtet arasynda 345-orynǵa kóterildi. Bul álemniń 4322 JOO arasyndaǵy básekede qol jetkizetin orny, ıaǵnı bul Qazaqstan men Orta Azııany bylaı qoıǵanda, TMD elderi JOO-lary arasynda ozyq jetistik bolyp sanalady.
Bul týraly atalǵan JOO-nyń baspasóz qyzmeti habarlaıdy.
Aıta ketý kerek, TMD elderiniń barlyq ýnıversıtetteri álemniń 900 úzdik ýnıversıteti reıtınginde mundaı jetistikke jete qoıǵan joq. Al Qazaqstannan EUÝ-den basqa 7 joǵary oqý orny enip otyr. Olar: ál-Farabı atyndaǵy QazUÝ, Q.Sátbaev atyndaǵy QazUTÝ, Abaı atyndaǵy QazUPÝ, M.Áýezov atyndaǵy OQMÝ, QBTÝ, E.Bóketov atyndaǵy QarMÝ jáne Abylaıhan atyndaǵy Qazaq halyqaralyq qatynastar jáne Álem tilderi ýnıversıteti.
Reıtıng kóshbasynda jyldaǵydaı Amerıka men brıtan ýnıversıtetteri: Massachýsets tehnologııalyq ýnıversıteti, Stenford ýnıversıteti, Garvard ýnıversıteti, Kembrıdj ýnıversıteti jáne Kalıfornııa tehnologııalyq ınstıtýty.
EUÝ bul baıqaýlarǵa 2009 jyldan beri turaqty qatysyp keledi. Sońǵy bir jylda 26 orynǵa kóterilgen oqý orny Qazaqstan jáne Ortalyq Azııa ýnıversıtetteri arasynda aıtýly jetistikke qol jetkizdi. Sonymen qatar sońǵy jyldary Quacquarelli Symonds (QS) halyqaralyq kompanııasy ashylǵanyna 50 jyl tolmaǵan álemniń JOO arasynda «QS Top 50 Under 50» degen jańa reıtıngi nátıjesinde EUÝ 32-orynǵa turaqtady. Bul reıtıngke TMD-nyń bir de bir ýnıversıteti ilinbegenin eskersek, naǵyz ilgerileýdiń úlgisi jáne úsh jyl qatarynan 32,38 oryndardy ustap keledi.
Eýrazııa ulttyq ýnıversıteti Eýropalyq ǵylymı-ónerkásiptik palatasy «Eýropalyq standart: joǵary oqý oryndarynyń reıtıngi:» kórsetkishi boıynsha da álemniń 2 678 JOO qatysqan baıqaýda Qazaqstandaǵy 23 joǵary oqý oryndary arasynan jetekshi bestikke endi. Nebári qurylǵanyna 20 jyl bolǵan oqý ornynyń abyroıyn asqaqtatqan bul kórsetkishter - bilim berý isi sapasynyń artyp, álemdik standarttarǵa saı jaraqtandyrylýyn tórtkúl dúnıege dáleldese kerek. QS reıtıngi negizgi alty kórsetkish boıynsha baǵalaıdy. Olardyń ishinde oqý ornynyń akademııalyq bedeli, jumys berýshiler arasyndaǵy abyroıy, shetel stýdentteri men halyqaralyq deńgeıdegi oqytýshylar quramy sekildi sekildi jaılar eskeriledi.
Sondaı-aq L.N.Gýmılev atyndaǵy Eýrazııa ulttyq ýnıversıteti eki jyl qatarynan Bilim sapasyn qamtamasyzdandyrý táýelsiz qazaqstandyq agenttigi (BSQA) qorytyndysy boıynsha da kósh bastap keledi.
