EUÝ-diń «Attraktsıon» teatry astanalyqtarǵa «Chıkago» qoıylymyn usyndy
ASTANA. QazAqparat - L.N. Gýmılev atyndaǵy Eýrazııa ulttyq ýnıversıtetiniń "Attraktsıon" stýdenttik jastar teatry 15 naýryzda barshaǵa tanymal "Chıkago" mıýzıklynyń jańa qoıylymyn astanalyq kórermenderge usyndy.
Bul kúni "Astana" ulttyq sýret galereıasynda ıne shanshar oryn bolmady. Kórermenderdiń qoıylymdy jyly qabyldady, dep habarlaıdy atalǵan joǵary oqý ornynyń baspasóz qyzmeti.
Aıta keteıik, "Attraktsıon" stýdenttik jastar teatry 2010 jyly qurylǵan bolatyn. Bıyl ujymǵa 5 jyl tolady. Osy ýaqyt ishinde atalmysh teatr Astana qalasy men respýblıkamyzǵa keńinen tanylyp úlgerdi. Halyqaralyq jáne respýblıkalyq konkýrstarǵa jıi qatysyp júr. Alǵan ataq, dańqtary jer jarmasa da úlken abyroıǵa ıe. Qoıylymdaryn TMD boıynsha kórsetýge lıtsenzııalary bar. Bir sózben aıtqanda, "Chıkago", "Mama Mıa", "Qubyjyq pen arý qyz", "Prodıýserler" qoıylymdary óz kórermenderin tapqan.
Eýrazııa ulttyq ýnıverstıtetiniń "Attraktsıon" stýdenttik jastar teatry ázirlegen mıýzıklge qazaqstandyq model Evgenııa Klıshına (Roksı Hart), teatr ánshisi ári ártisi Janna Aksartova (Velma Kellı), al negizgi róldi Nazarbaev Ýnıverstıtetiniń stýdenti ári "Qazaqstan daýysy" jobasynyń burynǵy qatysýshysy Nursultan Esenqul somdady. Rejısseri, horeografy ári mátinin aýdarǵan Ilıas Danııarov. Sondaı-aq, teatrdyń kórkemdik bezendirilýine "Astana" ulttyq sýret galereıasynyń dırektory Leıla Mahattyń erekshe úles qosqanyn da aıta ketken oryndy.
Qoıylymnyń sońǵy daıyndyqtary 28 aqpan jáne 7 naýryz kúni Eýrazııa ulttyq ýnıversıtetiniń sahnasynda kórsetilgen bolatyn. Endi mine, "Attraktsıon" stýdenttik jastar teatry sol daıyndyqtarynan keıin ózderiniń jańa mıýzıklyn astanalyqtarǵa usynyp, kórermenderdiń alǵystaryna bólenip otyr.
