EUÝ-de Elbasynyń «Táýelsizdik dáýiri» kitaby talqylandy
Jıyn barysynda Qazaqstan Respýblıkasynyń negizin qalaǵan Tuńǵysh Prezıdentimizdiń «Táýelsizdik dáýiri» kitaby talqylandy. Kongreske respýblıkanyń tarıh-gýmanıtarlyq ǵylymdar salasynyń kórnekti ókilderi, QR qoǵam qaıratkerleri, sonymen qatar sheteldik qonaqtar qatysty.
Kongresti ótkizýdiń basty maqsaty - Memleket basshysynyń «Táýelsizdik dáýiri» kitabynda baıandalǵan tarıhı bastamashyl ıdeıalardy talqylaý jáne nasıhattaý. Osy arnada ulttyq rýhanı órleý jáne qoǵamdyq sananyń jańǵyrý máseleleri, bilim berý isi jáne tarıh ǵylymynyń ózekti máselelerin taldaý, arhıvter men mýzeılerdiń jumysyn jańa sapalyq deńgeıge kóterý, ulttyq tarıh konteksindegi joǵary oqý oryndary men mektep oqýlyqtarynyń mazmundyq jaǵdaıyn jaqsartý sııaqty máseleler qamtyldy.
Tarıhı pýblıtsıstıka janrynda jazylǵan, qazaq jáne orys tilderinde basylǵan Elbasynyń bul «Táýelsizdik dáýiri» - «Era nezavısımostı» eńbegi elimizdiń jańa tarıhy men onyń erteńine degen avtordyń kózqarasyn tanytady.
Qazaqstan tarıhshylarynyń ulttyq kongresi basqarma tóraǵasy, QR Ulttyq ǵylym akademııasynyń akademıgi Erlan Báttashuly Sydyqovtyń kirispe sózimen bastaldy.
«Ózderińizge málim, 2018 jyl erekshe eldik mejeden bastaldy,- dep atap kórsetken E.Sydyqov Memleket basshysynyń halyqqa Joldaýy bizdi Qazaqstan joly aıasynda odan saıyn toptastyra túskenine nazar aýdardy.
«Baǵyt - aıqyn, is-sharalar baǵdary da belgilendi. Sonyń ishinde adamı kapıtalǵa jaýapty bilim-ǵylym salasynyń moınyndaǵy jaýapkershilik naqtylandy. Joldaýda Elbasy Rýhanı jańǵyrýdy da, Táýelsizdik dáýiri qundylyqtary men qaǵıdattaryn da jeke-jeke júıelep aıtty. Bárimizge mindetter júktedi»,-dedi ol.
Sondaı-aq ol Memleket basshysynyń jańa kitaby - qoǵam, ásirese tarıhshylar qaýymy jyly qabyldaǵan irgeli eńbek ekendigin atap ótti. Tarıhshylardyń ulttyq kongresiniń búgingi maqsaty - atalǵan eńbektiń bilim júıesine qajetti ádisnamalyq, ádistemelik negizderin qarastyrý ekendigin toqtalǵan ǵalym osy rette aldyda turǵan basty mindetterge toqtaldy.
- Táýelsizdik jeńisi men jemisi Elbasy esimimen tyǵyz baılanysty. Endeshe Nursultan Nazarbaevtyń - jańa memleket negizin qalaýshy jáne ult kóshbasshysy retindegi eren qyzmetin álemdik saıası lıderler qatarynda zertteýdi jańa satyǵa kóterý;
- Prezıdenttiń jańa kitabynda Táýelsiz Qazaqstan jolyn álemdik órkenıet úderisi arnasynda zerdeleýdiń jańa ádisnamalyq túbiri túzilgen. Mamandar osyny jańa zertteýlerdiń tuǵyry etip alýy tıis;
- Memleket basshysynyń asa mańyzdy bastamalary men ıdeıalary barlyq deńgeıdegi bilim mekemeleriniń oqý úderisine engizilgeni jón;
- Rýhanı órleý men jańǵyrýǵa tikeleı yqpal etetin bilim jáne mádenıet júıesi «Táýelsizdik dáýirin» temirqazyq etip alýy qajet;
- Elbasy eńbeginiń negizinde joǵary, arnaýly, orta mektep oqýlyqtarynyń mazmunyn sapalandyrý kerek. El tarıhyn Elbasynyń ózi bastap baıandap jazýy búkil qoǵamdyq sanaǵa zor serpin berdi. Bul kitap - strategııalyq mańyzdy eńbek. Prezıdent aıqyn, batyl, dáıekti, tııanaqty túrde tarıhty shynaıy jazý ádisnamasyn qalyptastyryp otyr. Bul - ǵalymdarǵa da, oqytýshylarǵa da qajet ǵylymı ustyn.
«Maman retinde aıtarymyz, «Táýelsizdik dáýirindegi» kózqaras naqtylyǵy, pikir tereńdigi, tujyrymdama negizdiligi, ádisteme utqyrlyǵy - bárimiz úshin úlken rýhanı olja. Bul kitap maqsat-mindetterimizdi júzege asyrýdyń basty ádistemelik quralyna aınalatynyna senimdimiz. Kitap avtory - Otan tarıhynyń bar kezeńin óz basynan ótkergen, barlyq mejege mańdaı teri sińgen kóregen qaıratker ǵana emes, tereń bilim men shyńdalǵan tájirıbe ıesi»,-dedi ǵalym.
«Elbasy árqashan: «Bizdiń óz jolymyz bar... Bizdiń el - óz zańy, óz joly, óz keleshegi bar el» deıdi. Endeshe, búgingi Qazaqstan joly - qaıtalanbas jol. Onyń Elbasy - eldiktiń nyshany, Táýelsizdik baıandylyǵynyń kepili.Sondyqtan Uly Dala eliniń jańa tarıhyn jazýdaǵy ustanymdar Prezıdent eńbegindegi tujyrymdardan bastaý alyp, izashar oılaryn shynaıy óristetýi tıis»,- dep túıindedi sheshen óz oılaryn.
Osydan keıin tarıh ǵylymy salasynda eńbek sińirip júrgen kásibı mamandar baıandamalaryn jasady: Sh. Ýálıhanov atyndaǵy Tarıh jáne etnologııa ınstıtýtynyń dırektory, tarıh ǵylymdarynyń doktory, professor Zııabek Kabýldınov, QR Prezıdenti Arhıviniń dırektory, tehnıka ǵylymdarynyń doktory, professor Borıs Japarov, «Qazaqstan Respýblıkasynyń Tuńǵysh Prezıdenti - Elbasy kitaphanasy» MM dırektorynyń orynbasary, saıası ǵylymdardyń doktory, professor Ámirhan Rahymjanov, Semeı qalasynyń Shákárim atyndaǵy memlekettik ýnıversıtetiniń rektory, tarıh ǵylymdarynyń doktory, professor Meıir Eskendirov, jazýshy, qoǵam qaıratkeri, ekonomıka ǵylymdarynyń doktory, professor Myrzageldi Kemel, Qostanaı memlekettik pedagogıkalyq ınstıtýtynyń rektory, tarıh ǵylymdarynyń doktory, professor Erkin Ábil, «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalıuly, L.N. Gýmılev atyndaǵy Eýrazııa Ulttyq ýnıversıteti Tarıh fakýltetiniń dekany, tarıh ǵylymdarynyń doktory, professor Tilegen Sadyqov sekildi kórnekti ǵalymdar oı-pikirlerimen bólisti.
Jıyn qorytyndysy boıynsha Qarar qabyldandy.
