EUÝ-de «ashyq esik kúnderi» ótedi
ASTANA. 6 sáýir. QazAqparat - Erteń L.Gýmılev atyndaǵy Eýrazııa ulttyq ýnıversıtetinde «ashyq esik kúnderi» ótedi, dep habarlady bilim ordasynyń baspasóz qyzmetinen.
Sharanyń basty maqsaty - mektep bitirýshi túlekterdi otandyq bilim berýde eń úzdik bolyp otyrǵan EUÝ-de bilim alýǵa shaqyrý.
Ashyq esik kúnine Astana qalasynyń 65 mektebi, qalalyq bilim bólimi, mektep dırektorlary, ata-analar, qoǵamdyq uıymdardyń ókilderi qatysady. EUÝ-dyń bas ǵımaratyndaǵy «Astana» atrıýmynan mektep bitirýshi túlekter oqý ornyndaǵy fakýltettermen tolyq tanysyp, aqparat alýǵa múmkindigi bar.
Aıta keteıik, byltyr 11 140 mektep bitirýshi túlek, onyń ishinde 2 053 - «Altyn belgi» ıegeri, 268-i ǵylymı jobalar men respýblıkalyq pándik olımpıadalardyń júldegerleri, sondaı-aq Qazaqstannyń barlyq aımaǵynan jáne sheteldiń azamattary Eýrazııa ýnıversıtetiniń stýdenti atandy. Osyndaı kórsetkishter nátıjesinde EUÝ byltyr QS World University Rankings halyqaralyq reıtingi jasaǵan saraptama nátıjesinde 450 jetekshi ýnıversıtettiń qataryna endi.
