EUÝ-da shyǵys halyqtarynyń Naýryz merekesine oraı festıval ótkizildi

NUR-SULTAN. QazAqparat - Eýrazııa ulttyq ýnıversıtetiniń Halyqaralyq qatynastar fakýltetinde jyl saıyn Naýryz merekesi aıasynda ótetin dástúrli «Shyǵys kóktemi» festıvali ótkizildi, dep habarlaıdy QazAqparat. Shara Túrki jáne Iran halyqtarynyń uly Naýryz merekesine, sondaı-aq Azııa men Shyǵys Eýropanyń barlyq halyqtary úshin mańyzy zor kóktemniń kelýine arnalǵan.

«Shyǵys kóktemi» festıvali Ázerbaıjan Respýblıkasy, Iran Respýblıkasy, Qytaı Halyq Respýblıkasy, Túrkııa Respýblıkasy, Ózbekstan Respýblıkasy, Palestına memleketi, Aýǵanstan Islam Respýblıkasy, Qyrǵyz Respýblıkasy elshilikteriniń jáne mádenı ókilderiniń, sondaı-aq Qazaqstan halqy Assambleıasynyń qyrǵyz jáne ózbek etnomádenı birlestikteriniń qoldaýymen ótkizildi. Atalmysh dıplomatııalyq mıssııalar halyqaralyq qatynastar fakýltetinde ótetin túrli is-sharalarǵa dostyq peıilderimen únemi qoldaý kórsetip, belsene qatysyp keledi», delingen habarlamada.

Jıyn memleket qaıratkeri Myrzataı Joldasbekovtiń alǵysózimen ashyldy.

Odan keıin Arab, Ázerbaıjan, Iran, Qytaı, Túrkııa, Aýǵanstan, Qyrǵyzstannyń Qazaqstandaǵy Tótenshe jáne ókiletti elshileri óz lebizderin bildirip, qarym-qatynastyń damý baǵyty týraly áńgimeledi.

Shyǵystaný kafedrasynyń parsy tobynyń stýdentteri «Eıd-e novrýz» jáne «Djoddeıe-ıek tarafe» ánderin shyrqady. Japon toby stýdentteri «Senbonzakura & Tokyo drift» bıin bılep jáne «Go» ánin aıtty. Shyǵystaný kafedranyń ekinshi kýrs stýdentteriniń oryndaýynda «Yetalemo amr diab» áni oryndaldy. Qytaı eliniń mádenıeti men ónerin ıgerip júrgen Halyqaralyq fakýltetiniń bıshi qyzdary qytaı bıimen sahna tórinde óner kórsetti.

Koreı halqynyń mýzykasy áýezdiligi men syrshyldyǵy tyńdaǵan adamnyń júrek pernesin sherteri anyq. Birinshi kýrs stýdentteriniń oryndaýynda koreı ánderinen poppýrı oryndaldy.

Arab toby І jáne ІІ kýrs stýdentteri «Mývashahat» bıin bıledi. Al, qytaı tobynyń І kýrs stýdentteri taǵy bir qytaı ánin (神话) shyrqady.

Koreı tobynyń ІІІ kýrs stýdentteriniń oryndaýynda Koreı zamanaýı bıi Blackpink «DDU DU DDU DU» oryndaldy.

Halyqaralyq qatynastar fakýltetinde bilim alatyn jastar oqýdan tys ýaqyttaryndaǵy ónerge degen qushtarlyǵy men óz mamandyǵyna degen súıispenshiligi merekelik kontsertte shyrqalǵan ánder men bıler arqyly dáleldendi.

Shyǵys elderiniń mádenıeti jáne salt-dástúrimen etene tanysqan meımandar dastarhan basyna jıylyp, ulttyq taǵamnan jáne shyǵys halyqtarynyń mázirinen dám tatty.