«Eurovision-2019»: Tel-Avıvte alǵashqy fınalıster anyqtaldy
TELЬ-AVIV. QazAqparat - Tel-Avıvte «Eurovision-2019» án baıqaýynyń birinshi jartylaı fınaly aıaqtaldy, dep habarlaıdy «QazAqparat» HAA. Onyń qorytyndysy boıynsha, 18 mamyr kúngi fınalda óner kórsetetin on qatysýshynyń esimi jarııalandy. Olar qazylar alqasy men kórermenniń daýys berýi arqyly anyqtaldy.
Baıqaýdyń resmı saıtyndaǵy aqparatqa sáıkes, fınalǵa Gretsııa (Katerına Dýska), Belarýs (Zena), Serbııa (Nevena Bojovıch), Kıpr (Tamta Gogýadze), Estonııa (Vıktor Kron), Chehııa ( «Leık Malavı» toby), Aýstralııa (Keıt Mıller-Haıdke), Islandııa («Hatarı» toby), San-Marıno (Serhat) jáne Slovenııadan (Zala Kral men Gashper Shantl) kelgen ánshiler ótti.
Izraılde «Eurovision-2019» baıqaýy bastalǵanyn buǵan deıin habarlaǵan bolatynbyz. «Habar» telearnasy konkýrsty tikeleı efırde kórsetedi. "Kórermender mamyrdyń 14-inen 15-ine qaraǵan túni jáne 16-nan 17-ine qaraǵan túni saǵat 01:00-de - jartylaı fınaldy, al mamyrdyń 18-inen 19-yna qaraǵan túni saǵat 01:00-de Grand-fınaldy tamashalaı alady", - delingen aqparatta.
Osymen 64 ret uıymdastyrylyp otyrǵan sharaǵa 41 memleket qatysýda. 2000 jyldan bastap 5 memlekettiń (Frantsııa, Germanııa, Italııa, Ispanııa, Ulybrıtanııa) jáne saıys ótetin eldiń (osy jyly Izraıl) qatysýshylary grand-fınalǵa avtomatty túrde ótedi.
Izraıl buǵan deıin eki ret (1979 jáne 1999 jyldary) Eurovision baıqaýyn ótkizgen bolatyn.
Baıqaý alǵash ret 1956 jyly uıymdastyryldy, oǵan 7 el qatysty. Jeńis sany boıynsha Irlandııa (7 jeńis) - birinshi oryndy, Shvetsııa (6 jeńis) - ekinshi oryndy, Lıýksembýrg, Frantsııa jáne Ulybrıtanııa (árqaısysy 5 jeńisten) úshinshi oryndy ıelenip otyr.
