«Eurovision-2019» baıqaýy tikeleı efırde kórsetiledi
NUR-SULTAN. QazAqparat - «Habar» telearnasy Izraıldiń Tel-Avıv qalasynda ótetin «Eurovision-2019» án baıqaýyn tikeleı efırde kórsetedi, dep habarlaıdy QazAqparat.
Kórermender mamyrdyń 14-nen 15-ne qaraǵan túni jáne 16-nan 17-ne qaraǵan túni saǵat 01:00-de jartylaı fınal, al mamyrdyń 18-nen 19-na qaraǵan túni saǵat 01:00-de - Grand-fınaldy tamashalaıdy.
Osymen 64 ret uıymdastyrylyp otyrǵan sharaǵa 41 memleket qatysady. Baıqaýdyń sharty boıynsha ár elden bir oryndaýshy (nemese top (6 adamnan aspaýy qajet) uzaqtyǵy 3 mınýttan aspaıtyn án oryndaıdy.
Aıta ketý kerek, 2000 jyldan bastap 5 memlekettiń (Frantsııa, Germanııa, Italııa, Ispanııa, Ulybrıtanııa) jáne saıys ótetin eldiń (osy jyly Izraıl) qatysýshylary avtomatty túrde grand-fınalǵa ótedi.
Izraıl buǵan deıin eki ret (1979 jáne 1999 jyldary) Eurovision baıqaýyn ótkizgen bolatyn.
Baıqaý alǵash ret 1956 jyly ótti, oǵan 7 el qatysyp, ár ónerpaz eki ánnen oryndaǵan. Búgingi tańda jalpy alǵanda 1500-den astam án shyrqaldy. Jeńis sany boıynsha Irlandııa (7 jeńis) birinshi oryndy, Shvetsııa (6 jeńis) ekinshi oryndy, Lıýksembýrg, Frantsııa jáne Ulybrıtanııa (árqaısysy 5 jeńisten) úshinshi oryndy ıelenip otyr.
