Eýrotop Grekııaǵa 86 mlrd. eýro qarjylaı kómek kórsetýge kelisti
ASTANA. QazAqparat - Halyqaralyq kredıtorlar aldaǵy úsh jylda Grekııaǵa 86 mlrd. eýro berýge kelisti. Eýroaımaq elderiniń qarjy mınıstrleri juma kúni qaryz daǵdarysy jaǵdaıyn basynan keship otyrǵan Grekııaǵa kómek kórsetý jańa baǵdarlamasynyń egjeı-tegjeılerin alty saǵattan astam ýaqyt talqylady.
«Biz oń nátıjege qol jetkizip, sońǵy kelispeýshilikterdi joıdyq», - dedi Eýrotop tóraǵasy Ierýn Deısselblým.
Qarjylyq kómek úshin Grekııa buǵan deıin birqatar reformalardy ótkizýge kelisken, sonyń ishinde zeınetaqy jasyn ósirý, jekeshelendirý, salyqty kóbeıtý jáne shyǵyndardy qysqartý sharalary bar.
Kómektiń jańa baǵdarlamasy aıasynda Grekııa birinshi transhty tamyz aıynyń sońynda alýy yqtımal, dep jazady Bı-bı-sı.
Juma kúni Grekııa parlamentiniń depýtattary túni boıy jáne tańǵa deıin sozylǵan talqylaýdan keıin Eýroodaqtyń 86 mlrd. eýroǵa baǵalanyp otyrǵan kómeginiń jańa, úshinshi toptamasynyń talaptaryn maquldady.
Oǵan sáıkes 25 mlrd. eýro grekııalyq bankterdi qaıta kapıtaldandyrýǵa jiberiledi.
