Eýrostandart boıynsha qazaq tilin oqytýǵa arnalǵan ádistemelik keshen jaryqqa shyqty
ASTANA. Tamyzdyń 31-i. QazAqparat /Jasulan Amanbaıuly/ - Búgin, Astanada «Abyroı» qazaq mádenıeti men tilin damytý korporatıvtik qory «Qazaq tili», «Kazakh language. Made easy» qazaq tilin oqytýǵa arnalǵan ádistemelik keshenin jaryqqa shyǵardy, dep habarlaıdy QazAqparat.
«Bul oqytý kesheni eýropalyq standart boıynsha jasalǵan. Adamnyń meılinshe aýqymdy sóz qoryn qalyptastyrýǵa baǵyttalǵan ádisteme júıesi eń negizgi, eń qajetti degen sózderdi qamtyp, birneshe deńgeıge bólinip oqytylýymen de jaqsy. Bul ádistemeniń ózindik ereksheligi - onyń úsh tildi sózdik, kitaptary da úsh tilde berilgen», deıdi joba týraly pedagogıka ǵylymdarynyń doktory, professor Márıám Qondybaeva.
Keshen ishinde 5 kitaptan turady jáne ár keshende oqýlyq, muǵalimge arnalǵan ádistemelik qural, oqýshyǵa arnalǵan dápter jáne SD dısk berilgen. Joba avtory - pedagogıka ǵylymdarynyń doktory, professor Iraıda Qubaeva.
Joba jetekshisi jáne «Abyroı» qorynyń dırektory Bıbigúl Jeksenbaıdyń aıtýynsha, «Qazaq tili», «Kazakh language. Made easy» ádistemesi memlekettik tildi orys jáne aǵylshyn tilderi arqyly oqyp meńgerýge múmkindik beredi. Ol balalarǵa, sonymen qatar eresek adamdarǵa da arnalǵan. Ázirshe oqýlyqtar 1 myń dana kóleminde basylyp shyqty. Alda atalǵan oqýlyq Bilim jáne ǵylym mınıstrligine usynylatyn bolady.
