«Eýrosportta» 1 aı boıy Almaty týraly rolık kórsetiledi

Bul týraly Qazaqstan Velosport Federatsııasynyń baspasóz qyzmeti málim etti.

Bıyl «Almaty týry» halyqaralyq jarysy formatymen de erekshelenip otyr - Velosıpedshilerdiń halyqaralyq odaǵy (UCI) reglamenti boıynsha shossedegi kópkúndik velojarysy jańa statýsyn aldy.

Baspasóz máslıhatynda Almaty qalasy dene shynyqtyrý jáne sport basqarmasynyń jetekshisi Ábil Donbaev, Qazaqstan velosıped sport federatsııasynyń vıtse-prezıdentteri Amanbek Qulshyqov pen Aleksandr Vınokýrov, UCI tehnıkalyq konsýltanty Per Hatsebaýt, sondaı-aq, «Astana Pro Team» komandasynyń veloshabandozdary Alekseı Lýtsenko men ıAkob Fýlsang sóz sóıledi.
 

Talqylaý barysynda spıkerler besinshi «Almaty týrynyń» erekshelikteri, naqtyraq aıtsaq, jarystyń jańa formaty, qatysýshy komandalar men qalanyń daıyndyǵy týraly aıtyp berdi.

«Almaty týry - 2017» alǵash ret eki kezeń boıynsha ótedi. Ótken jyldary halyqaralyq velojarys «krıterıým» formatynda ótip keldi, qatysýshylar bul kezde aınalma marshrýtty qaıta-qaıta aınalyp ótken. Al bıyl veloshabandozdar sóreden márege deıingi qashyqtyqty ótkerýi qajet, olardyń arasynda jatqan qalalyq joldyń qashyqtyǵy júz shaqyrymnan asady. 
 

«Almaty týry - 2017» jarys joly túrli landshaftta jatyr: velojarystyń negizgi bóligi Almaty qalasynyń asfalt tóselgen kósheleri bolsa, jarystyń márege jetetin bóligi taýly aımaq - bul «Medeý» muz aıdynynyń terrıtorııasy.

Ekinshi kezeńniń máresi «Medeýde» ornalasqan jol jaıly Aleksandr Vınokýrov aıtyp berdi: «Qıyn jol. Bireýler ońaı dep oılap qalýy múmkin, biraq 160 shaqyrym júrip ótkennen keıin joly tik emes trassamen márege jetý qıyn bolady. Tikushaqtan jasalatyn translıatsııadan taýlarymyzdy kórsetedi. Velosporttyń basqa sport túrlerinen aıyrmashylyǵy osy ǵoı - jarys ótip jatqan eldiń peızajyn tamashalaýǵa bolady». 
 

«Almaty týrynyń» birinshi kezeńi 30 qyrkúıekte «Astana» alańynyń mańynda, Qazaq-Brıtan tehnıkalyq ýnıversıteti terrıtorııasynan bastaý alady. "Qalalyq aınalym" Tóle bı, Fýrmanov, Sátbaev, Baızaqov kóshelerin, Abaı dańǵylyn jáne Jeltoqsan kóshesin qamtıdy. Máre «Almaty Arena» terrıtorııasynda bolady. Jarystyń ekinshi kezeńi, 1 qazanda «Halyq Arena» ǵımaratynyń mańynan bastalady da, veloshabandozdar «Shyǵys aınalma joly - ál-Farabı» sheńberimen júredi, al fınaldyq bóligi Tuńǵysh Prezıdent Saıabaǵynan «Medeý» muz aıdynyna deıin jalǵasyp, osynda máre núktesi ornalasady.

«Almaty týry - 2017» qalalyq tirshilik jaǵdaıyna beıimdelgen bolady. Birinshiden, velojarystyń sóre men máre núkteleri belgili bir ǵımarattardyń mańynda ornalasady, ıaǵnı kósheler men joldar qamtylmaıdy. Ekinshiden, bıyl joldardy jabý protsesi dınamıkalyq ári jyldam iske asyrylady. Qatysýshylar belgili bir kóshege jetip, mejege jetkennen keıin joldar qaıta ashylyp otyrady. Sonymen qatar, «Almaty týry - 2017» kórermenderi men jankúıerlerin qaladan velojarys máresi ornalasatyn «Medeý» muz aıdynyna jetkizetin kólik uıymdastyrylady.  
 

«Keıbir joldar jabylatyndyqtan qala turǵyndaryna yńǵaısyzdyq týyndaıdy, biraq soǵan qaramastan Almaty qalasynyń ákimshiligi «Almaty týryn» ótkizýge barynsha qoldap, kómektesip jatyr, - dep atap ótti Amanbek Qulshyqov. - Alaıda adamdar «Almaty týrynyń» dástúrli týrǵa aınalǵanyn uǵynady, sharadan keıin olardan jyly lebizder estip jatamyz. Bıyl biraz ýaqytqa qalanyń ortalyǵy jabyq bolady, sondyqtan turǵyndar túsinistik tanytady dep úmittenemiz. Onyń ústine, bul yńǵaısyzdyqty barynsha bildirtpeý úshin barymyzdy salyp jatyrmyz».

 «Almaty týry - 2017» velododasyna álemniń 17 elinen 20 komanda qatysady. Dástúrli túrde jarysqa Qazaqstan atynan jalǵyz kásipqoı komanda «Astana Pro Team» shyǵady. Otandyq komanda alǵashqy tórt jarysta da osy jarysta top jarǵan edi. «Almaty týry - 2017» qatysýshylarynyń ishinde Italııa men Frantsııadan proqurlyqtyq komandalar, álemniń ár elinen kelgen 14 qurlyqtyq komanda, sonymen qatar Ózbekstannan, Slovakııadan jáne Qazaqstannan 3 ulttyq komanda bar.
 

«Ádette komandalardy biz shaqyratynbyz. Bul joly, jarystan shamamen jarty jyl buryn «Almaty týryna» qatysqysy keletin komandalardan kóptegen hat aldyq. Jáne solardyń ishinen eń myqtylaryn tańdaýǵa múmkindik boldy, - dep áńgimeledi Amanbek Qulshyqov. - Árıne, bul jarystan keıin mundaı komandalardyń sany birneshege artady dep senemiz».

 «Jarys «Eýrosport» arnasynda tikeleı efırde kórsetiletinimen qatar, bıyl Qazaqstannyń velosport federatsııasy bul arnada bir aı boıy Almaty jaıly rolık kórsetilýine yqpal etti», - dedi Ábil Donbaev BAQ ókilderine bergen suhbatynda. - Álemniń elýden astam eli qalamyzdyń qalaı órkendep jatqanyn tamashalaı alady».

Sonymen qatar Per Hatsebaýt baspasóz máslıhatynda BAQ ókilderine «Almaty Týrynyń» tórt utys jeıdesin tanystyrdy. Jarys jeńimpazyna kók jeıde arnalǵan, úzdik sprınterge - jasyl, úzdik taýlyq kúlgin jeıde, al úzdik qazaqstandyq veloshabandoz qazaqtyń dástúrli oıýy bar jeıdeni kıedi.
 

Alekseı Lýtsenko men ıAkob Fýlsang óz kezeginde kórermenderge áserli ári qyzyq jarys ótkizýge ýáde berdi.

Negizgi jarys bóligimen qatar, velojarys uıymdastyrýshylary velosıped sportynyń jankúıerleri men velosportsúıer qaýymǵa sporttyq kóńil kóterý baǵdarlamasyn daıyndady. Ońtústik astana turǵyndaryna «Astana» velokomandasynyń juldyzdarymen áńgimelesý, tipti jarysyp kórý múmkindigi berildi.

Baspasóz máslıhaty aıaqtalǵannan keıin Almaty Bike velosıpedterimen qalalyq velosúıer qaýymǵa arnalǵan «Sprint of Almaty» sprınterlik jarysy ótkizildi. Jarysqa kámelet jasyna tolǵan, kásibı emes velosport jankúıerleri qatysty. Jalpy alǵanda sharaǵa 75 adam tirkeldi.

Qyzyqty ári qyzý jarysta jartylaı fınalǵa shyqqandar iriktelip, keıin fınaldyq dodaǵa úmitkerler anyqtaldy. «Sprint of Almaty» jarysynyń qorytyndysynda áýesqoı jarystyń 3 júldegeri anyqtalyp, marapattaldy: 1-oryn - Ahmetbek Shynǵys; 2-oryn - Aıjaryqov Rýslan; 3-oryn - Djanzakov Nııaz.

«Sprint of Almaty» jarysynda kózge túsken qatysýshylar baǵaly syılyqtarmen marapattaldy, al jeńimpaz materıaldyq syılyqpen qatar «Týr Almaty - 2017» jarysyna akkredıtatsııa utyp aldy, bul arqyly jeńimpaz jarysty óz kózimen jarys kavalkadesinde tehnıkalyq kólikpen júrý múmkindigin aldy.

Negizgi júldegerlermen qatar "Miss Sprint of Almaty" anyqtalyp, jeńiske degen erik-jigeri úshin kózge túsken qatysýshyny marapattady.

Búgin «Almaty týry-2017» qatysýshy komandalardyń tanystyrylymy men veloshabandozdardyń resmı jattyǵýy ótedi. Al jabylý saltanaty «Medeý» sport kesheniniń sahnasynda uıymdastyrylady.