«Eýrosport» telearnasy men «Astana» velokomandasy birlesken aýqymdy jobany qolǵa alýda
ASTANA. Qyrkúıektiń 3-i. QazAqparat /Jasulan Amanbaıuly/ - «Eýrosport» telearnasy men «Astana» velokomandasy «Sportshymen birge saıahat» atty jańa televızııalyq jobanyń túsirilimin jasaıdy. Bul týraly búgin, juma kúni Astanada ótken baspasóz máslıhatynda telearnanyń Shyǵys Eýropa jáne Ortalyq Azııa aýmaǵy boıynsha kommertsııalyq dırektory Sasha Laıer málim etti, dep habarlaıdy QazAqparat.
«Sportshymen birge saıahat» bıylǵy jyldyń qazan aıynda túsirile bastaıdy. 20-ǵa tarta qysqa serııalardan turatyn fılmdi «Lonely Planet» prodakshn-kompanııasy jasaıtyn bolady. Fılm ıdeıasy boıynsha Álemdik bedel-ataqqa ıe «Astana» veloshabandozdary Qazaqstandaǵy qalalardy aralap, súıikti demalys oryndarymen, tarıhı jáne tabıǵı qoryqtarymen, ózderi jıi baratyn meıramhanalar men murajaılarmen tanystyrady.
«Qazaqstan shetelde óziniń «Astana» syndy velokomandasymen tanymal. «Astana» velokomandasy, menińshe, óte brendti qubylys. Kóptegen eýropalyqtar bul komandany tabysqa, jetistikke balap jatady. Biz «Astana» komandasyn úlgige ala otyryp, Qazaqstannyń basqa da qabiletterin kórsetkimiz keledi», dep atap kórsetti S. Laıer.
Túsirilim jáne aınalymǵa shyǵarýǵa arnalǵan shyǵyndy tolyqtaı «Eýrosport» arnasy óz moınyna alyp otyr.
Eýrosport - eýropalyq iri televızııalyq holdıng. Onyń quramyndaǵy eki telearna álemniń 59 eline 20 tilde habar taratady. Onyń negizgi baǵyty sporttyq matchtardyń translıatsııasyn, álemdik sport jańalyqtary men baǵdarlamalary. Búgingi tańda telearnanyń 20 mln. tarta kórermeni bar.
