EuroSkills Herning 2025: Qazaqstan TOP-5 el tizimine endi
ASTANA. KAZINFORM – Danııada ótken EuroSkills Herning 2025 jarysynda top jarǵan astanalyq stýdent men onyń tálimgeri álemdik dodadaǵy qyzyqty ári qıyn sátterden syrt shertti.
— Jarys jumysshy mamandyqtaryn kótermeleý maqsatynda ótkiziledi. Onyń tarıhy 1949 jyly alǵash ret Ispanııada ótken. Onda qurylys, qyzmet kórsetý, logıstıka sekildi birneshe kategorııa boıynsha jarys uıymdastyrylady, bizdiki IT mamandyqtary boıynsha boldy. Sonyń ishinde shákirtim Aǵybaı veb-tehnologııalar kategorııasynda synǵa tústi. Saıys 3 kúnge sozyldy, - dedi joba jetekshisi Aıjan Zııadanova Jibek Joly telearnasyndaǵy «Bugin Live» baǵdarlamasynda.
Al astanalyq stýdent Muhametjan Aǵybaı bul jarysta qaı tapsyrma qıyn bolǵanyn atap ótti.
— Daıyndyq kezeńi 2 aıǵa sozyldy. Kún saıyn naqty tapsyrmalardy oryndadyq. Qıyndyqtardyń biri shekteýli ýaqyt ishinde tapsyrmalardy oryndaý boldy. Ár kún saıyn 7-8 saǵattan baǵdarlamalaýmen aınalystyq, - deıdi ol.
Jas daryn bul jarysta eki medal jeńip alǵan. Biri óz kategorııasy boıynsha qola bolsa, endi biri — Best of Nation, ıaǵnı «Úzdik ókil» ataǵyn jeńip alǵany úshin berilgen altyn medal.
Joba jetekshisi Aıjan Zııadanovanyń aıtýynsha, halyqaralyq jarysqa úmitkerler áýeli el ishinde irikteledi. Aýdandyq, oblystyq jáne qalalyq deńgeıde úzdik nátıje kórsetken jas talanttardyń ishinen myqtylar tańdap alynyp, ulttyq quramaǵa shaqyrylady.
— Men WorldSkills álemdik chempıonatyna 2018 jyldan beri sarapshy retinde qatysamyn. Qazaqstannyń deńgeıi jaqsy dep aıta alamyn, sońǵy 5 jyldyń ishinde TOP-5 qatarynda kelemiz, - deıdi tálimger.
Onyń aıtýynsha, bul saıysqa bir adam tek bir ret qana qatysa alady eken.
Aıta keteıik, buǵan deıin Danııada ótken EuroSkills Herning 2025 IX Eýropalyq kásibı sheberlik chempıonatynda qazaqstandyq stýdentter 7 úzdik medal alǵanyn jazǵan edik.
Saıysqa álemniń 32 elinen 600 jas talant qatysqan bolatyn. Qazaqstandyq kolledj stýdentteri 25 quzyret boıynsha baq synady. Olardyń qatarynda veb-tehnologııalar, mehatronıka, CAD ınjenerlik grafıkasy, jelilik ákimshilendirý, grafıkalyq dızaın, dánekerleý tehnologııasy, meıramhana servısi, kondıterlik is, avtomehanıka jáne basqa da baǵyttar bar.