Eýroparlamenttiń 15 múshesi sybaılas jemqorlyqqa qatysty tergeý aıasynda nazarǵa ilikti
ASTANA. KAZINFORM — Brıýsselde Eýropalyq parlamenttegi kezekti atyshýly sybaılas jemqorlyq isi tergelip jatyr, dep habarlaıdy Kazinform agenttiginiń menshikti tilshisi.
Bul joly Belgııa prokýratýrasy men polıtsııasynyń nazaryna lobbıster, Eýroparlament depýtattary men olardyń assıstentteri ilikti. Jergilikti baspasóz bul tergeýdiń Eýropalyq Odaq astanasynda qytaılyq kompanııanyń múddelerin lobbıleýge baılanysty ekenin jazady.
Politico basylymynyń málimetinshe, tergeý aıasynda shamamen 15 burynǵy jáne qazirgi Eýroparlament depýtaty tekserilip jatyr.
13 naýryz tańerteń Belgııa polıtsııasy 20-dan astam mekenjaıǵa, sonyń ishinde Brıýsseldegi qytaılyq Huawei tehnologııalyq alyp kompanııasynyń keńselerine tintý júrgizdi.
Belgııa prokýratýrasynyń ókili bılik «Eýroparlamenttegi belsendi sybaılas jemqorlyq, qujattardy qoldan jasaý jáne aqshany jylystatý boıynsha aldyn ala aıyptaýlar negizinde tergeý júrgizip jatqanyn» málimdedi.
Prokýrordyń aıtýynsha, polıtsııa sondaı-aq Flandrııa, Vallonııa jáne Portýgalııada tintýler men arnaıy operatsııalar ótkizdi. Birneshe adam qamaýǵa alynǵan.
Eýroparlament buǵan deıin de sheteldik memleketterdiń EO sheshimderine yqpal etýine baılanysty janjalǵa ushyraǵan. 2022 jyldyń jeltoqsanynda Eýroparlament vıtse-spıkeri Eva Kaılı men taǵy eki depýtat Parsy shyǵanaǵy elderiniń biriniń múddelerin lobbılegeni úshin tutqyndalǵan bolatyn.
Bul is boıynsha Eýroparlamenttiń adam quqyqtary jónindegi qosalqy komıtetiniń tóraıymy, «Sotsıal-demokrattar» (S& D) fraktsııasynyń múshesi, belgııalyq saıasatker Marııa Arena da qamaýǵa alynǵan.
Belgııa prokýratýrasy óz málimdemesinde «2021 jyldan bastap qazirgi ýaqytqa deıin kúmándi áreketter júıeli ári óte jasyryn túrde kommertsııalyq lobbızm túrinde júzege asyrylyp kelgenin» atap ótti.
Tergeýge alynǵan isterdiń arasynda «saıası laýazymdarǵa taǵaıyndaý úshin syıaqy berý, qymbat syılyqtar (tamaq pen jol shyǵyndaryn tóleý), sondaı-aq saıası sheshimder konteksinde jeke kommertsııalyq múddelerdi ilgeriletý maqsatynda turaqty túrde fýtbol matchtaryna shaqyrýlar uıymdastyrý» bar ekeni aıtyldy.