Eýroparlamentte Ýrsýla fon der Lıaıenge senimsizdik votýmy qabyldanbady
ASTANA. KAZINFORM — Eýroparlament Ýrsýla fon der Lıaıen basqaratyn Eýropalyq komıssııa tóraǵasyna qatysty kezekti senimsizdik votýmyn qabyldamady. Bul bastamany frantsýzdyq ońshyl kúshter kótergen, dep habarlaıdy Deutsche Welle.
22 qańtar, beısenbi kúni ótken daýys berý barysynda 390 eýrodepýtat senimsizdik votýmyna qarsy shyqty. Al bastamany nebári 165 depýtat qoldady. Osylaısha, Eýrokomıssııa tóraǵasyna senimsizdik bildirý úshin qajet bolǵan úshten eki daýys jınalmady.
Senimsizdik votýmyn frantsýzdyq ońshyl kúshterdiń kóshbasshysy Jordan Bardella men onyń «Eýropa úshin patrıottar» toby Eýroodaqtyń Ońtústik Amerıkadaǵy Merkosýr birlestigine múshe eldermen saýda kelisimine qol qoıýyna baılanysty usynǵan. Olardyń pikirinshe, Ýrsýla fon der Lıaıen «eýropalyq fermerler men azamattardyń pikirin elemeı otyr». Bul qarardy ózge ońshyl popýlıstermen qatar Germanııanyń ýltraońshyl Germanııa úshin balama partııasynyń úsh depýtaty da qoldaǵan.
Ýrsýla fon der Lıaıen daýys berý aldyndaǵy talqylaýǵa qatysqan joq. Senimsizdik votýmynyń negizgi bastamashysy Jordan Bardella da jıynǵa kelmegen. Bul — Eýroparlamenttiń qazirgi shaqyrylymy aıasynda fon der Lıaıenge qarsy usynylǵan senimsizdik votýmynyń tórtinshi ret qabyldanbaı qalýy.
Ótken jyldyń qazan aıynyń basynda fon der Lıaıenge qarsy eki birdeı senimsizdik votýmy sátsiz aıaqtalǵan bolatyn. Onyń biri solshyl fraktsııanyń bastamasymen, ekinshisi «Eýropa úshin patrıottar» ýltraońshyl tobynyń usynysymen engizilgen. Ońshyl depýtattar bul joly klımatty qorǵaý saıasatyn, kóshi-qon máselelerin, sondaı-aq Eýrokomıssııa tóraǵasynyń áreketterindegi ashyqtyqtyń jetkiliksizdigin jáne tsenzýrany synǵa alǵan. Al solshyl fraktsııa fon der Lıaıendi AQSh prezıdenti Donald Tramppen jasalǵan «apatty kedendik kelisim» úshin aıyptaǵan.
Al shilde aıynda rýmyn depýtaty George Pıperae usynǵan senimsizdik votýmy da qoldaý tappaǵan. Ol «Eýropalyq konservatorlar men reformashylar» (ECR) tobynyń atynan engizilgen. Bul toptyń quramyna Italııa, Polsha, Frantsııa jáne Ispanııadaǵy ýltraońshyl partııalar kiredi. Bastamashy retinde Pıperae koronavırýs pandemııasy kezinde vaktsınalar satyp alý máselesine baılanysty fon der Lıaıen men Pfizer farmatsevtıkalyq kompanııasynyń basshysy arasyndaǵy hat almasýǵa qatysty janjalǵa nazar aýdarǵan. Sonymen qatar ol Eýrokomıssııany Rýmynııadaǵy prezıdent saılaýyna aralasty dep aıyptap, EO-nyń qorǵanys shyǵyndaryn qarjylandyrý baǵdarlamasyna qarsy shyqqan.
Aıta keteıik, Eýroparlament EO–AQSh saýda kelisimin ratıfıkatsııalaýdy ýaqytsha toqtatty.