Eýroparlamentte Qazaqstannyń reformalary men EO-men seriktestigi talqylandy
ASTANA. KAZINFORM – Búgin «Patrıottar Eýropa úshin» fraktsııasy Eýroparlamentte Qazaqstandaǵy saıası protsesterge arnalǵan konferentsııa uıymdastyrdy, dep habarlaıdy Kazinform agenttiginiń EO-daǵy menshikti tilshisi.
Qazaqstan men EO arasyndaǵy strategııalyq seriktestikke arnalǵan is-shara eýrodepýtattardyń úlken qyzyǵýshylyǵyn týdyrdy. Іs-sharaǵa Ortalyq Azııa elderi jáne Mońǵolııa delegatsııasynyń (DCAS) múshelerin qosa alǵanda Eýropalyq parlamenttiń úsh fraktsııasynyń ókilderi qatysty.
Dóńgelek ústel jumysyna Qazaqstan Respýblıkasynyń Belgııadaǵy Tótenshe jáne Ókiletti Elshisi, sondaı-aq Eýropalyq Odaq pen NATO-daǵy Qazaqstan Respýblıkasy ókildiginiń basshysy Roman Vasılenko qatysty.
«Dıplomatııalyq álem» (Belgııa) basylymynyń bas redaktory Alberto Týrkstra pikirtalasty asha otyryp, Qazaqstanda bolyp jatqan ishki saıası protsesterdiń, sonyń ishinde Eýropalyq Odaqtyń kózqarasy men múddeleri turǵysynan ózektiligin atap ótti.
«Patrıottar Eýropa úshin» tobynyń jetekshi múshesi Terrı Marıanı (Frantsııa) Ortalyq Azııa aımaǵynyń EO úshin mańyzdylyǵynyń artyp kele jatqanyn atap ótti.
- Astana óz qarqynymen birtindep, egemendi jańǵyrtý jolyn tańdap otyr. Biz dál osy pragmatızmdi túsinýimiz jáne ony eshbir jaǵdaıda ózimizdiń aldyn ala túsinikterimizben almastyrmaýymyz kerek. Bul konferentsııa – Qazaqstan men Eýropalyq Odaq arasyndaǵy qarym-qatynasty tolyqtaı jáne eki taraptyń da ańqaýlyǵyna boı aldyrmaı qarastyrýǵa tamasha múmkindik, - dep atap ótti eýrodepýtat.
Ortalyq Azııa boıynsha delegatsııa múshesi Joron Vırdjını Qazaqstandaǵy konstıtýtsııalyq reformalar Eýropalyq parlament aıasynda qyzyǵýshylyq týdyryp otyrǵanyn atap ótti. Onyń aıtýynsha, bizdiń elimizde demokratııalyq ınstıtýttar nyǵaıýynyń belsendi protsesi júrip jatyr.
Budan basqa, mundaı is-sharalar Qazaqstan jáne EO-nyń qazirgi geosaıası máseleler boıynsha kózqarasy týraly pikir almasý úshin paıdaly.
