Eýroparlamentte Izraıl týyn edenge tastaǵan depýtatqa shara qoldanylmaq

Eýroparlament prezıdenti Roberta Metsola edenge EO jáne Izraıl jalaýlaryn tastaǵan depýtatqa qatysty «barlyq qajetti sharany» qabyldaıtynyn málimdedi.

Metsola saıasatkerdiń aty-jónin atamaǵanymen, keıin onyń Rıma Hassan ekeni belgili boldy. Onyń keńsesi Hassannyń 2023 jylǵy 7 qazanda Izraılde bolǵan terakt qurbandaryn eske alýǵa arnalǵan kórme kezinde Izraıl týyn alyp tastaǵanyn rastady.

Parlamenttegi derekkózderdiń málimetinshe, ol kórme avtory, ızraıldik sýretshi ıAron Bobpen sózge kelip qalǵan. Hassan sýretshini bolǵan oqıǵanyń «birjaqty nusqasyn» usyndy dep aıyptaǵan.

— Bul ǵımaratta ár adam ózin qaýipsiz sezinýi kerek. Sondyqtan kez kelgen adamnyń ózgelerdiń qaýipsizdigine kúmán keltiretin áreketterin biz qatań aıyptaımyz. Álemde antısemıtızm kúsheıip turǵan kezde Eýropanyń evreı qaýymdastyǵy aldynda jaýapkershiligimizdi sezinýimiz qajet. Olar bizge qaraǵanda bul jerdi ózderiniń de ortaq úıi dep sezinýi tıis, — dep jazdy Metsola oqıǵadan keıingi málimdemesinde.

Metsola jalaýlardy alyp tastaǵan depýtatqa qatysty «barlyq tıisti shara» qabyldanatynyn aıtty.

Sırııadaǵy palestınalyq bosqyndar lagerinde azamattyǵy joq bolyp dúnıege kelgen Hassan Frantsııada palestınalyqtardy qoldaıtyn eń tanymal belsendilerdiń biri sanalady. Qazir Frantsııada oǵan qatysty bılik terrorızmdi aqtaý dep baǵalaǵan boljamdy málimdemelerine baılanysty sot protsesi júrip jatyr. Al Izraıl bıligi ony HAMASPEN baılanysy bar dep aıyptaıdy.

Hassanǵa sógis jarııalanýy, parlament jumysyna qatysýyn ýaqytsha shekteý jáne/nemese 60 kúnge deıin táýliktik tólemderinen (kúnine 350 eýro) aıyrý jazasy qoldanylýy múmkin.

Metsola apparatynyń ókili Euronews-ke habarlaǵandaı, parlament prezıdıýmy qazir oqıǵaǵa baǵa berý jáne qandaı jaza qoldaný keregin anyqtaý úshin beınebaqylaý kameralaryndaǵy jazbalardy qarap jatyr. Onyń aıtýynsha, sheshim qazirgi plenarlyq sessııa kezinde qabyldanbaıdy.

Hassannyń keńsesi taratqan málimdemede depýtattyń Izraıl týyn tuǵyrdan alyp tastaǵany moıyndaldy. Alaıda sol tuǵyrǵa bekitilgen Eýropalyq Odaq týy tepe-teńdik buzylǵandyqtan qulap ketkeni aıtyldy.

Málimdemede «eshbir tý taptalmaǵany nemese búlinbegeni» atap ótilgen.

— Hassannyń keńsesi onyń bul áreketi Eýroparlament ǵımaratynda Izraıldiń dıplomatııalyq ókildigimen birlesip uıymdastyrylǵan is-sharaǵa qarsylyq retinde jasalǵanyn málimdedi. Іs-shara barysynda, atap aıtqanda, Izraıl zymyrandarynyń bólshekterinen jasalǵan buıymdar satylymǵa qoıylǵan, — delingen málimdemede.

Hassannyń bul áreketi depýtattar arasynda jáne parlamentten tys jerde de pikirtalas týǵyzdy.

— Tipti, osyndaı qaıǵyly oqıǵa aldynda da ol óziniń antısemıttik kózqarasyn keıinge ysyra almaıdy. Ol uıalýy kerek, — dedi Sotsıalıster men demokrattar fraktsııasynyń ókili, parlament vıtse-prezıdenti Pına Pıcherno.

«Eýropany jańartý» tobynyń ókili Natalı Lýazo men Eýropalyq konservatorlar men reformashylar tobynyń múshesi Nıkola Prokachchınıdi qosa alǵanda, basqa da depýtattar áleýmettik jelilerde jáne parlamenttegi sózderinde Hassandy synǵa aldy.

Izraıldiń syrtqy ister mınıstri Gıdon Saar bolǵan oqıǵany «masqara ári shekten shyqqan, biraq, ókinishke qaraı, tańǵalarlyq emes» dep atady.

Buǵan deıin Izraıl áskeri atysty toqtatý rejımine qaramastan Lıvannyń ońtústigine soqqy jasaǵanyn jazǵan edik.