Eýroparlament jolaýshylardyń quqyqtaryn kúsheıtýdi maquldady
ASTANA. KAZINFORM – Eýroparlament seısenbi kúni saparlar úzilgen jaǵdaıda jolaýshylardyń quqyqtaryn qorǵaýdy kúsheıtýge baǵyttalǵan jańartylǵan erejelerdi túpkilikti maquldady. Qujatty 652 depýtat qoldap daýys berdi, ekeýi qarsy boldy, segizi qalys qaldy. Bul týraly Kazinform agenttiginiń Strasbýrgtegi menshikti tilshisi habarlaıdy.
Jańa reglament kóliktiń barlyq túrin – áýe, temirjol, avtobýs jáne sý kóligin qamtıdy. Ol jyl saıyn shamamen 13 mlrd saparǵa qatysty qoldanylady.
Negizgi erejelerdiń biri týrıstik agenttikter men onlaın-platformalar arqyly satyp alynǵan bıletterge qatysty. Reıs toqtatylǵan jaǵdaıda jolaýshy bılettiń tolyq qunyn, sonyń ishinde deldaldyń komıssııasyn da 14 kún ishinde qaıtaryp alýǵa quqyly.
Áýe kompanııasy aqshany deldalǵa eń kóbi jeti kún ishinde aýdarýǵa mindetti. Odan keıin agenttik qarajatty taǵy jeti kún ishinde jolaýshyǵa qaıtarýy kerek. Sondaı-aq deldaldar klıentterge aqshany qaıtarý tártibi týraly aldyn ala aqparat berýge mindetteledi.
Jańa erejeler múgedektigi bar jáne qozǵalysy shekteýli jolaýshylardyń quqyqtaryn da kúsheıtedi. Eger mundaı jolaýshyǵa birge júretin adamnyń kómegi qajet bolsa, ol adam tegin usha alady. Bul – poıyzdarda, avtobýstarda jáne paromdarda qoldanystaǵy normalarǵa uqsas tártip.
Sonymen qatar aqshany qaıtarý jáne ótemaqy alý úshin Eýropa boıynsha biryńǵaı ótinish nysany engiziledi. Ol Eýropalyq komıssııanyń saıtynda Eýropalyq odaqtyń barlyq tilinde jáne kóliktiń barlyq túri boıynsha qoljetimdi bolady.
Ulttyq baqylaýshy organdardyń ókilettigi de keńeıtiledi. Endi olar tasymaldaýshylarǵa qatysty tek jolaýshylardyń shaǵymdary negizinde ǵana emes, óz bastamasymen de tekserý júrgize alady.
Reglament boıynsha baıandamashy, Italııa depýtaty Matteo Rıchchı jańa erejelerge qatysty pikir bildirdi.
– Biz azamattarymyzdyń quqyqtaryn áýe kompanııalarynyń paıdasynan joǵary qoıamyz. Deldaldar arqyly bılet satyp alǵan jolaýshylar óz quqyqtaryn saqtaıdy, al qozǵalysy shekteýli adamdarǵa kórsetiletin qoldaý jaqsarady, – dedi ol.
Qujat kúshine enýi úshin Eýropalyq odaq Keńesiniń resmı maquldaýynan ótýi kerek. Osydan keıin ol EO-nyń resmı jýrnalynda jarııalanady.
Jańa erejeler 2027 jylǵy 23 qazannan bastap qoldanysqa engiziledi. Bul áýe jolaýshylarynyń quqyqtaryn jańartýǵa baǵyttalǵan jeke ózgeristermen bir mezgilde júzege asady.
Eske salaıyq, buǵan deıin Eýroparlament áýe jolaýshylarynyń quqyqtaryn keńeıtetin jańa erejelerdi maquldady. Endi otbasylar ushaqta qatar ornalasqan oryndardy tegin tańdaı alady, al reıs keshikken jaǵdaıda ótemaqy tóleý tártibi saqtalady.
Sondaı-aq Eýropa parlamentiniń otyrystaryna qatysatyn depýtattar azaıyp bara jatqanyn jazdyq.
