Eýroparlament Túrkııanyń EO-ǵa múshe bolýy jaıly kelissózderdi toqtatýǵa daýys berdi
BRıÝSSELЬ. QazAqparat - Strasbýrgtegi plenarlyq sessııada Eýropalyq parlament Túrkııanyń Eýroodaqqa kirýi týraly kelissózderdi toqtatýǵa arnalǵan qarardy maquldady, dep habarlaıdy «QazAqparat» HAA-nyń Brıýsseldegi menshikti tilshisi.
Qarar Túrkııanyń Eýroodaqqa kirý máselesin toqtatýǵa usynys jasaıdy. Onyń sebebi retinde eldegi sátsiz memlekettik tóńkeristen keıingi túrik bıliginiń «úılesimsiz» kertartpalyǵy aıtylǵan. «Túrkııa EO-nyń mańyzdy seriktesteriniń biri bolyp tabylady», - delingen mátinde. - «Biraq seriktestik qatynasta yntymaqtastyq ornatý ekijaqty bolýy kerek... Túrkııa bundaı saıası yqtııarlyqty tanytyp otyrǵan joq».
Túrkııada ólim jazasy qaıta qalpyna keltirilse, bul eldi EO quramyna qabyldaý isi tolyqtaı toqtatylady dep atalyp ótilgen.
Qarardy qoldap 479 depýtat, al qarsy - 37 depýtat daýys berse, daýys berýden - 107 depýtat qalys qalǵan.
