Eýroparlament Kosovoǵa qatysty qabyldanǵan sharalardy dereý alyp tastaýdy talap etti
ASTANA. KAZINFORM — Eýroparlamenttiń Syrtqy ister komıteti (AFET) Kosovonyń EO-ǵa kirýdegi ilgerileýi týraly baıandamany qabyldady, dep jazady Anadoly agenttigi.
Eýroparlament músheleri Eýropalyq Odaq (EO) Kosovoǵa 2023 jyly salynǵan jazalaý sharalaryn «tez arada» alyp tastaýǵa shaqyrdy.
Eýroparlamenttiń Syrtqy ister komıteti (AFET) Kosovonyń 2023 jáne 2024 jyldardaǵy EO-ǵa kirýdegi ilgerileýi týraly baıandamany qabyldady.
Atap aıtqanda, baıandamada Kosovonyń Eýroodaqqa múshe bolýǵa talpynysy jolyndaǵy reformalary joǵary baǵalanyp, eldiń odaqqa kirýdegi belsendiligi atap ótildi.
Sondaı-aq baıandamada Eýroodaqtyń Kosovoǵa qarsy jazalaý sharalaryn «tez arada alyp tastaý» qajet ekeni aıtyldy ári synǵa alyndy.
Bul sharalar «Kosovonyń eýropalyq qundylyqtarǵa degen adaldyǵyna eleýli qaıshylyq keltiredi ári Belgrad pen Prıshtına arasyndaǵy dıalogty adal nıetpen qaıta bastaýǵa kedergi jasaıdy», - delingen habarlamada.
Sondaı-aq baıandamada Kosovo men Serbııa bıligin 2013 jylǵy Brıýssel kelisimi men 2023 jylǵy Ohrıd kelisimin oryndaýǵa shaqyrady.
EO 2023 jyly Prıshtına eldiń soltústigindegi shıelenisti báseńdetý úshin sharalar qoldanbady degen syltaýmen Kosovoǵa shekteýler engize bastady.
Bul sharalar, atap aıtqanda, Kosovonyń birqatar salalarda Eýroodaqtan qarajat alýyna kedergi keltirrdi.
Kosovo men Serbııa arasyndaǵy shıelenis Belgrad úkimetiniń 2008 jyly birjaqty túrde táýelsizdigin jarııalaǵan Prıshtınany óz aýmaǵy retinde qarastyrýymen de baılanysty.
Kosovo men Serbııa arasyndaǵy qarym-qatynasty qalypqa keltirý maqsatynda 2011 jyly EO-nyń deldaldyǵymen dıalog protsesi bastalǵan, alaıda bul protsess taraptardyń ustanymdaryndaǵy qaıshylyqtarǵa baılanysty jıi úzilip turady.
Eske sala keteıik, buǵan deıin Eýroparlamenttiń 15 múshesi sybaılas jemqorlyqqa qatysty tergeý aıasynda nazarǵa ilikkenin jazǵan bolatynbyz.