Eýroparlament komıteti EO-dan tys deportatsııa ortalyqtaryn qurýdy maquldady
ASTANA. KAZINFORM – Eýroparlament komıteti EO-dan shyǵarylǵandar úshin úshinshi elderde ortalyqtar qurý boıynsha sharalar paketin maquldady. Bul másele boıynsha jalpy daýys berý 12 mamyrda ótýi múmkin, dep habarlady DW.
Eýroparlamenttiń azamattyq bostandyqtar, ádilet jáne ishki ister komıteti Eýropalyq Odaqtan shyǵarylǵandar úshin úshinshi elderde ortalyqtar qurý boıynsha zańnamalyq bastamany bastady. Dúısenbi, 9 naýryzda Eýroparlament depýtattary konservatorlar men ońshyl partııalardyń daýystarymen EO-nyń ımmıgratsııalyq saıasatyn aıtarlyqtaı qatańdatatyn sharalar paketin maquldady.
Qujat Eýropa halyq partııasynyń (EHP) parlamenttik toby men ońshyl fraktsııalar arasyndaǵy kelisimniń nátıjesi bolyp tabylady. Bul sharalar EO elderine EO-dan tys deportatsııa ortalyqtaryn qurýǵa múmkindik beredi. Baspana suraýlary qabyldanbaǵan adamdardy osy ortalyqtarǵa jiberý josparlanyp otyr. Pakette bıliktiń sheshimine qaramastan EO-dan shyǵýdan bas tartqandar úshin kirýge tyıym salýdan bastap túrme jazasyna deıingi qatań jazalar da bar.
Eýroparlamenttiń jalpy otyrysynda deportatsııa ortalyqtaryn qurý týraly daýys berý 12 naýryzda ótýi múmkin.
EO-nyń mıgratsııalyq saıasatyn qatańdatý adam quqyqtary uıymdarynyń qatań synyna ushyrady. Olar jańa erejeler adam quqyqtarynyń júıeli túrde buzylýyna ákelýi múmkin dep qorqady, sebebi zańsyz mıgranttar eshqandaı baılanysy joq elderge deportatsııalanady.
Sonymen qatar 2025 jyly EO-da baspana suraý sany aldyńǵy jylmen salystyrǵanda 19 paıyzǵa azaıdy. Degenmen, EO-dan shyǵýǵa buıryq berilgenderdiń tek 20 paıyzy ǵana týǵan eline oralyp jatyr.
Eske sala keteıik, Islandııa Eýropalyq Odaqqa kirý jóninde referendým ótkizýdi josparlap otyr.
