Eýroparlament qaterli isik qaýpine baılanysty hımııalyq zattarǵa jańa shekteýdi maquldady
ASTANA. KAZINFORM – Eýroparlament «máńgilik hımıkattar» dep atalatyn polıftorlanǵan qosylystarǵa (PFAS) qatysty talaptardy qatańdatýdy qoldady, dep habarlaıdy BILD.
Bul zattar tabıǵatta is júzinde ydyramaıdy jáne sý men adam aǵzasynda jınalýy múmkin.
Jańa normalar ózen, kól jáne jerasty sýlarynda osy zattardyń shekti mólsherin belgileıdi. Qujat buǵan deıin Eýropalyq odaq elderi tarapynan kelisilgen.
Shekteýler tek PFAS-qa ǵana emes, sonymen qatar keıbir dári-dármekter men pestıtsıdterge de qatysty bolady. EO memleketteri 2027 jyldyń sońyna deıin ulttyq zańnamalaryn jańartyp, al 2039 jylǵa deıin jańa ekologııalyq standarttardy tolyq engizýi tıis. Eń qaýipti zattar úshin merzim odan da erterek — 2033 jylǵa deıin belgilengen.
Eýropalyq retteýshilerdiń málimetinshe, PFAS baýyrǵa zııan keltirip, búırek pen atalyq bez qaterli isiginiń qaýpin arttyrýy múmkin. Sebebi bul zattar aǵzadan is júzinde shyǵarylmaıdy jáne qorshaǵan ortada jınala beredi.
Sonymen qatar ónerkásipte bul qosylystar keńinen qoldanylady: olar sý ótkizbeıtin kıimderde, jabyspaıtyn jabyndarda, kosmetıkada jáne basqa da kóptegen ónimderdiń quramynda kezdesedi.
Buǵan deıin EO elderinde aýyz sýdy osy zattardyń mólsherine júıeli túrde tekserý bastalǵan edi.
Aıta ketelik elimizde bir jylda 43 myńnan astam adamnan qaterli isik anyqtaldy.
