Eýroparlament Iran dıplomattarynyń óz ǵımarattaryna kirýine tyıym saldy
ASTANA. KAZINFORM — Eýroparlament tóraıymy Roberta Metsola dúısenbi kúni Iran Islam Respýblıkasynyń barlyq dıplomatııalyq qyzmetkeri men ókilderiniń Eýroparlamenttiń kez kelgen ǵımaraty men aýmaǵyna kirýine tyıym salý jóninde sheshim qabyldaǵanyn málimdedi, dep jazady Sınhýa.
— Bul sheshim ótken aıdyń sońynda Irannyń ár óńirinde bastalyp, keıin búkil eldi qamtyǵan jappaı narazylyqtar kezinde qaýipsizdik kúshteri men sherýshiler arasynda qaqtyǵystar bolǵany týraly habarlar aıasynda qabyldandy, — delingen habarlamada.
Irannyń jartylaı resmı Tasnim aqparat agenttiginiń málimetinshe, sońǵy eki aptada bolǵan tártipsizdikter saldarynan Irannyń keminde 111 qaýipsizdik qyzmetkeri qaza tapqan.
Al narazylyq aktsııalaryna qatysýshylar arasyndaǵy qurbandar týraly resmı derekter jarııalanǵan joq. Degenmen HRANA aqparatyna sáıkes narazylyq aktsııalary kezinde qaza tapqandar sany 544 adamǵa jetken.
Sonymen qatar áleýmettik jelilerde jarııalanǵan jáne táýelsiz derektermen rastalǵan kadrlar Keredj qalasyndaǵy úkimettik ǵımarattyń órtenip jatqanyn kórsetedi.
Irandaǵy ishki jaǵdaıdyń ózgerýi halyqaralyq kólik baǵyttary men aımaqtyq logıstıkaǵa áser ete bastady. Saldarynan Iran qalalaryna birneshe reıs toqtatyldy.
Sondaı-aq, Iran 12 saǵat boıy ınternetsiz qalǵany belgili boldy.
Iran bıligi narazylyq aktsııasyn uıymdastyrǵandar tutqyndalǵanyn habarlady.
Budan buryn Iran narazylyq aktsııalarynan keıin jaǵdaıdy tolyq baqylaýda ustaıtynyn málimdedi.