Eýroparlament Eýropadaǵy turǵyn úı daǵdarysyn eńserýge kiristi
ASTANA. KAZINFORM - Eýroparlamenttiń turǵyn úı daǵdarysy jónindegi arnaıy komıteti (HOUS) «Eýropalyq odaqtaǵy turǵyn úı daǵdarysy: laıyqty, turaqty ári qoljetimdi baspanaǵa qatysty usynystar» atty baıandamany daýysqa saldy. Bul týraly Kazinform agenttiginiń menshikti tilshisi habarlaıdy.
Atalǵan komıtet — Eýroparlament tarıhynda alǵash ret qurylǵan arnaıy organ. Ol 2024 jyldyń jeltoqsanynda Eýropa odaǵyna múshe elderdiń basym bóliginde ýshyǵyp turǵan turǵyn úı tapshylyǵy máselesin sheshý úshin qurylǵan.
Ispanııadan saılanǵan eýrodepýtat Borha Hımenes Larrastyń (EPP fraktsııasy) jetekshiligimen ázirlengen baıandama bir jylǵa sozylǵan tyńdaýlardyń, Mılan, Barselona, Vena sekildi problemaly qalalarǵa jasalǵan saparlardyń jáne myńdaǵan túzetýlerdi qaraýdyń nátıjesi boldy.
Baıandamaǵa 1456 túzetý usynyldy. Olardyń arasynda 49 usynys qorytyndy daýysqa berýge shyǵaryldy. Komıtet músheleri, onyń ishinde tóraǵasy Irena Tınaglı (S&D, Italııa), búkil Eýroodaqqa arnalǵan túpkilikti usynymdar nusqasyn bekitýi tıis boldy.
Baıandamanyń negizgi usynystary mynalardan turady:
— turǵyn úı qoryn arttyrýdy basty basymdyq etý, ıaǵnı qurylys pen jańǵyrtý qarqynyn jedeldetý, bıýrokratııalyq jáne ruqsat berý rásimderin qysqartý;
— qysqamerzimdi jalǵa berý platformalaryn (Airbnb jáne uqsas servıster) retteý, týrıstik turǵyn úıge ınvestıtsııalardy shekteý arqyly páterlerdi uzaq merzimdi naryqqa qaıtarý;
— bos turǵan turǵyn úılermen kúres, sebebi EO-daǵy turǵyn úı qorynyń shamamen 20 paıyzy paıdalanylmaı tur. Osyǵan baılanysty bos úılerge salyq salý jáne olardy májbúrli túrde naryqqa qaıtarý usynylady;
— EO qorlaryn tıimdi paıdalaný, atap aıtqanda, birigý qorlary, Eýropalyq ınvestıtsııalyq bank (EIB) jáne 2028–2034 jyldarǵa arnalǵan bolashaq kópjyldyq bıýdjet (MFF) arqyly qoljetimdi ári áleýmettik turǵyn úıge ınvestıtsııany eki ese arttyrý;
— osal toptardy qoldaý — jastardy, tabysy tómen otbasylardy, baspanasyzdardy qorǵaý jáne laıyqty turǵyn úıge qoljetimdilikti irgeli quqyq retinde taný;
— turǵyn úı naryǵyndaǵy alypsatarlyq pen «qarjylandyrýǵa aınaldyrý» úrdisine qarsy sharalar, tutas kvartaldardy satyp alatyn ınstıtýtsıonaldyq ınvestorlarǵa shekteý qoıý.
Daýys berý Frantsııanyń Strasbýrg qalasynda ótip, Eýroparlamenttiń mýltımedıalyq portalynda tikeleı efırde kórsetildi.
Komıtet maquldaǵannan keıin baıandama búkil Eýroparlamenttiń plenarlyq otyrysyna joldanady. Ol 2026 jyldyń naýryz aıynda qaralady dep kútilip otyr. Tek osy kezeńnen keıin ǵana rezolıýtsııa EP-nyń resmı ustanymyna aınalyp, Eýrokomıssııa men múshe memleketterdiń saıasatyna yqpal ete alady.
Eske salaıyq, 2010 jyldardan beri EO-da turǵyn úı baǵasy 55–60 paıyzǵa, al jaldaý aqysy 20–27 paıyzǵa qymbattaǵan. Keıbir elderde bul kórsetkish eki ese artqan. Eýropalyqtardyń shamamen 20 paıyzy tabysynyń 40 paıyzynan astamyn baspanaǵa jumsaıdy, al árbir onynshy azamat jaldaý aqysyn ýaqytynda tóleı almaıdy. Qazir Eýroodaqta 1 mıllıonnan astam baspanasyz adam bar. 30–35 jasqa deıingi jastardyń edáýir bóligi ata-anasymen birge turady, Polshada 25–34 jas aralyǵyndaǵy árbir ekinshi jas osy sanatqa jatady.
Búgingi daýys berý 2025 jyldyń jeltoqsanynda Eýrokomıssııa usynǵan qoljetimdi turǵyn úı jónindegi Eýropalyq baǵdarlama aıasynda ótip otyr. Kóptegen depýtat HOUS baıandamasyn osy jospardy «kúsheıtetin» qujat dep atap, alypsatarlyq pen bos turǵan páterlerge qarsy áldeqaıda qatań sharalar qabyldaýǵa shaqyryp otyr.
Osyǵan deıin Eýroparlamentte Orta dálizdiń ósip kele jatqan róli talqylanǵan bolatyn.