Eýroparlament EO–AQSh saýda kelisimin ratıfıkatsııalaýdy ýaqytsha toqtatty
ASTANA. KAZINFORM — Eýroparlament AQSh prezıdenti Donald Tramptyń qoqan-loqqylaryna baılanysty Eýropalyq odaq pen AQSh arasyndaǵy saýda kelisimin ratıfıkatsııalaýdy ýaqytsha toqtatpaq. Bul týraly EP-tegi jetekshi fraktsııa — Eýropalyq halyq partııasynyń basshysy Manfred Veber ZDF telearnasyna bergen suhbatynda málimdedi.
«Biz keshe túnde qabyldaǵan alǵashqy sheshim ótken jyldyń jazynda Eýropa men Amerıka Qurama Shtattary arasynda jasalǵan osy kelisimdi ratıfıkatsııalaý úderisin toqtatady. Bul amerıkalyq ónimderdiń EO-nyń ishki naryǵyna bajsyz kirgizilmeıtinin bildiredi», dedi Veber.
Onyń aıtýynsha, ratıfıkatsııany toqtatý — Vashıngtonǵa berilgen alǵashqy belgi.
«Tramp keshe túnde kóp nárseden aıyryldy», dep málimdedi EHP kóshbasshysy.
26 qańtarda eýroparlament depýtattary AQSh-tyń ónerkásiptik taýarlaryna salynǵan kedendik bajdardy joıýǵa qatysty EP-tiń ustanymy boıynsha daýys berýi tıis bolǵan. Bul — 2025 jyldyń jazynda Brıýssel men Vashıngton arasynda jasalǵan kelisimniń negizgi tarmaqtarynyń biri. Alaıda Politico gazetiniń dereginshe, Tramptyń málimdemelerine ashýlanǵan keıbir depýtattar daýys berýdiń múlde ótpeýin qalaıdy, osylaısha tarıfterdi alyp tastaý týraly sheshimdi «qatyryp» qoıýdy kózdeıdi.
Tramp senbi kúni Truth Social áleýmettik jelisinde jarııalaǵan málimdemesinde AQSh Ulybrıtanııadan, Germanııadan, Danııadan, Nıderlandtan, Norvegııadan, Fınlıandııadan, Frantsııadan jáne Shvetsııadan ákelinetin taýarlarǵa 10 paıyz kóleminde ımporttyq baj salyǵyn engizetinin málimdegen-di.
Bul bajdar taraptar Grenlandııany Vashıngtonnyń «tolyq ári túpkilikti ıemdenýi» jóninde kelisimge kelgenge deıin saqtalady. Tramptyń aıtýynsha, bul sheshim 1 aqpannan bastap kúshine enedi. Prezıdent sondaı-aq 1 maýsymnan bastap atalǵan baj mólsherlemesi 25 paıyzǵa deıin ósetinin naqtylady. Buǵan qosa, AQSh ákimshiliginiń basshysy Eýropanyń Grenlandııaǵa óz áskerin jiberý nıetin is júzinde synǵa alyp, muny «óte qaýipti oıyn» dep atady.
Al Grenlandııa men Danııada myńdaǵan adam AQSh prezıdenti Donald Tramptyń Grenlandııany basyp alý josparyna narazylyq bildirip, kóshege shyqty.