Eýroparlament depýtattary Brexit-ti maquldady
Kelisimdi qoldap 631 parlament múshesi daýys berse, 49 adam – qoldaǵan joq. Taǵy 13 adam daýys berýden qalys qaldy. Daýys berýdiń tarıhı mańyzdylyǵyn túsindire otyryp, spıkerlerdiń kópshiligi saıası toptardyń atynan Ulybrıtanııanyń ketýi EO men Ulybrıtanııa arasyndaǵy qarym-qatynastyń aıaqtalmaıtynyn, Eýropa halyqtaryn baılanystyratyn qarym-qatynastyń berik ekendigin jáne solaı qala beretinin atap ótti.
Olar sondaı-aq, Brexit-ten EO-nyń bolashaǵyn qalyptastyrýy tıis sabaq alý kerektigin atap ótti jáne Ulybrıtanııa men Eýroparlament múshelerine músheliktiń barlyq kezeńinde olardyń qosqan úlesi úshin alǵys aıtty. Kóptegen sóz sóılegender shyǵý týraly kelisimde kórsetilgen merzimderdi eskere otyryp, EO men Ulybrıtanııa arasyndaǵy bolashaq qatynastar týraly kelissózder qıyn bolatynyn aıtty.
Endi Ulybrıtanııanyń EO-dan tolyqtaı shyǵýy úshin Eýropalyq Odaq keńesiniń kelisimi qajet. Ótpeli kezeń 1 aqpannan bastalyp, 2020 jyldyń jeltoqsan aıynyń sońynda aıaqtalady. EO – Ulybrıtanııa bolashaq qatynastary týraly kez kelgen kelisim osy kezeńde, ıaǵnı ol 2021 jyldyń 1 qańtarynda kúshine enetin bolsa, tolyqtaı jasalyp bitýi tıis.
Ótpeli kezeń bir-eki jylda bir ret uzartylýy múmkin, biraq bul týraly sheshimdi EO - Ulybrıtanııa Birikken komıteti 1 shildege deıin qabyldaýy tıis. Parlament qarym-qatynas týraly bolashaq kelisimniń kez kelgenin maquldaýy tıis.
