Eýroparlament depýtattary Qazaqstanǵa keldi
ASTANA. KAZINFORM — Eýroparlamenttiń Ortalyq Azııa elderimen baılanys jónindegi delegatsııasynyń tóraǵasy Djýzı Prınchı (Italııa, «Eýropalyq halyqtyq partııa» toby) bastaǵan delegatsııa Qazaqstanǵa keldi. Bul týraly Kazinform agenttiginiń Brıýsseldegi menshikti tilshisi habarlady.
Eýroparlament depýtattary Qazaqstan men Eýropalyq odaq arasyndaǵy parlamenttik yntymaqtastyq jónindegi komıtettiń 23-otyrysyna qatysty. Sonymen qatar delegatsııa músheleri aımaqtyń damýymen jáne Qazaqstannyń batystaǵy kólik qaqpasy sanalatyn Aqtaý qalasynyń teńiz ınfraqurylymymen tanysý úshin qalaǵa barýdy josparlap otyr.
Ortalyq Azııa elderimen baılanys jónindegi delegatsııa (DCAS) resmı otyrystarmen qatar úkimet, parlament, azamattyq qoǵam jáne bıznes ókilderimen kezdesýler ótkizýdi dástúrge aınaldyrǵan.
Qazaqstanǵa attanar aldynda Kazinform tilshisi Eýroparlament depýtattarynan aldaǵy saparǵa qatysty pikir bildirýdi surady.
Slovakııalyq depýtat Katarına Rot Nevedalova Qazaqstanǵa qaıta kelip, qazaqstandyq parlamenttegi áriptesterimen kezdesýge múmkindik týǵanyna qýanyshty ekenin aıtty.
— Biz Aqtaý qalasyna baryp, ondaǵy jobalarmen tikeleı tanysamyz. Kaspıı teńiziniń jaǵasyndaǵy bul qalanyń qalaı damyp jatqanyn, kólik jobalary men basqa da nysandardyń jumysyn óz kózimizben kórý biz úshin óte mańyzdy, — dedi Katarına Rot Nevedalova.
Onyń aıtýynsha, sapar aıasynda qazaqstandyq stýdenttermen de kezdesý josparlanǵan.
— Olarmen áńgimelesip, Eýropalyq odaq pen bizdiń jobalar týraly qysqasha aıtyp bergimiz keledi. Sondaı-aq stýdentterdiń Erasmus baǵdarlamasyna qatysý tájirıbesin jáne Qazaqstannyń jas urpaǵyna qalaı kómektese alatynymyzdy bilý bizge qyzyq. Sondyqtan osy aptada kóptegen kezdesý men pikirtalas josparlanǵan. Qazaqstanǵa keletinimizge qýanyshtymyz, — dedi depýtat.
Frantsııadan saılanǵan Eýroparlament depýtaty Vırjını Joron sońǵy eki jarym jylda áriptesterimen birge Qazaqstanǵa ekinshi ret kelip otyrǵanyn aıtty. Sapar barysynda túrli máseleler talqylanbaq.
— Bizdiń delegatsııa quramynda 11 depýtat bar. Bul — aýqymdy delegatsııa. Onyń ishinde áriptesim Terrı Marıanı de bar. Biz Eýropalyq odaq pen Qazaqstan arasyndaǵy ekonomıkalyq baılanystardy, ásirese shıkizat óndirý jáne óńdeý salasyndaǵy yntymaqtastyqty talqylaýdy josparlap otyrmyz. Eýropalyq odaq Qazaqstanmen yntymaqtastyqty jalǵastyrýǵa múddeli. Biz ekijaqty qarym-qatynasty odan ári damytqymyz keledi, — dedi Vırjını Joron.
Onyń sózinshe, kezdesýlerdiń kún tártibine klımattyń ózgerýi, jasandy ıntellekt, kıberqaýipsizdik, sondaı-aq kólik salasyndaǵy yntymaqtastyq pen elder arasyndaǵy ózara baılanystardy damytý máseleleri de engizilgen.
Budan buryn Eýroparlamentte Qazaqstannyń reformalary men EO-men seriktestigi talqylandy.
