Eýroparlament depýtattary Ilon Maskty sóz bostandyǵy syılyǵyna taǵy da usyndy

ASTANA. KAZINFORM – Búgin Eýroparlamenttiń eki fraktsııasy AQSh-tyń tehnologııalyq magnatynyń kandıdatýrasyn Saharov syılyǵyna usyndy.  

Saharov atyndaǵy «Oı erkindigi» syılyǵy (Sakharov Prize for Freedom of Thought) — 1988 jyly Eýroparlament keńestik fızık jáne quqyq qorǵaýshy Andreı Saharovtyń qurmetine taǵaıyndaǵan adam quqyqtary jónindegi syılyq.

Syrtqy ister komıtetiniń otyrysy barysynda Eýroparlamenttiń eki fraktsııasy joǵaryda atalǵan syılyqqa I.Maskty usyndy.

Frantsýzdyq Eýroparlament múshesi Terrı Marıanı Ilon Maskty sóz bostandyǵy úshin kúrestiń «sımvoly» dep atady.

— Osy ınstıtýtty qosa alǵanda, júrgizilýi kerek kúres — bul sóz bostandyǵy úshin kúres, — dedi frantsýzdyq zań shyǵarýshy.

2023 jyly «Sáıkestilik jáne demokratııa» saıası toby amerıkalyq kásipkerdi Saharov syılyǵyna usyndy. «Sáıkestilik jáne demokratııa» kásipkerdiń Twitter-diń (Mask 2022 jyly satyp alǵan qazirgi H jelisi) ishki qujattaryn jarııalaý týraly sheshimin alǵa tartty. Top bul sóz bostandyǵy prıntsıpin qorǵaýmen birdeı dep eseptedi.

Biraq ol kezde I.Maskqa bul syılyq berilmedi. Qalǵan úsh iri fraktsııa bul marapatqa ırandyq kúrd áıel Mahsy Amınıdi usynǵan bolatyn.

Saharov syılyǵyna 50 myń eýro syıaqy kiredi. Syılyq jyl saıyn sóz bostandyǵyn, azshylyq quqyqtaryn qorǵaýǵa, halyqaralyq quqyqty qurmetteýge nemese demokratııany ilgeriletýge eleýli úles qosqan tulǵalarǵa nemese uıymdarǵa beriledi.

Tehnologııalyq magnat birneshe ret Eýrokomıssııamen, onyń ishinde bloktyń ishki naryǵynyń basshysy qyzmetin atqarǵan Terrı Bretonmen qaqtyǵysyp qalǵan. Osy kelispeýshilikterge qaramastan, ońshyl zań shyǵarýshylar Ilon Mask kelesi aıda komıtet deńgeıinde daýys berý arqyly qurastyrylatyn úsh úmitkerdiń qysqasha tizimine enedi dep úmittenedi. Qysqa tizimge ený Masktyń sóz bostandyǵy týraly kózqarasyn qorǵaý úshin Eýropalyq Parlamentke shaqyrylatynyn bildiredi. Bul — júlde fınalısteriniń dástúri.