Eýroparlament depýtattary EO bıýdjetin 2 trıllıon eýroǵa keńeıtýdi usyndy
ASTANA.KAZINFORM - Búgin Strasbýrgte Eýroparlament depýtattary 2028–2034 jyldarǵa arnalǵan kelesi jeti jyldyq bıýdjet kelissózderindegi Eýroparlamenttiń ustanymyn anyqtaıtyn aralyq esep boıynsha daýys berdi, dep habarlaıdy Kazinform agenttiginiń EO-daǵy tilshisi.
Karla Tavares (sotsıalıster men demokrattar) men Zıgfrıd Mýreshan (Eýropa halyq partııasy) daıyndaǵan esep Eýropalyq Komıssııa usynǵan kópjyldyq bıýdjetti 10%-ǵa, 2 trıllıon eýrodan asatyn deńgeıge deıin arttyrýdy usyndy.
Eýropalyq Parlamenttiń negizgi usynystary:
Negizgi bıýdjetti EO JІÓ-niń shamamen 1,27%-yna deıin arttyrý;
COVID-19 pandemııasy kezinde týyndaǵan qaryz tólemderin (NextGenerationEU) negizgi bıýdjet sheginen tys saqtaý;
EO-nyń jańa resýrstaryn engizý, sonyń ishinde iri tehnologııalyq kompanııalarǵa sandyq salyq salý;
Dástúrli shyǵys baptaryn senimdi qorǵaý – Biryńǵaı aýyl sharýashylyǵy saıasaty jáne Birlik saıasaty (aımaqtyq damý).
-Biz barlyq benefıtsıarlar úshin jetkilikti jáne boljamdy eýropalyq bıýdjetti usynyp otyrmyz. Ortasha 10%-ǵa ósimmen qorǵanys jáne básekege qabilettilik sııaqty jańa basymdyqtar úshin resýrstardy qamtamasyz etemiz, sonymen birge negizgi dástúrli saıasatty tolyq saqtaımyz, - dedi Zıgfrıd Mýreshan.
Eger esep plenarlyq otyrysta maquldansa, Eýropalyq Keńespen kelissóz júrgizý úshin Eýropalyq Parlamenttiń resmı mandatyna aınalady.
Bıýdjet boıynsha sońǵy sheshimdi Keńes qabyldaıdy, ony Parlament bekitedi.
Búgingi daýys berý nátıjesi EO-nyń aldaǵy jeti jylǵa qarjylyq múmkindikterin anyqtaıdy.
Buǵan deıin Eýropalyq Komıssııa Ormýz buǵazyndaǵy jaǵdaıǵa baılanysty daǵdarysqa qarsy jospar usynǵan bolatyn.
