Eýroparlament delegatsııasy resmı saparmen Qazaqstanǵa keledi
Bul jóninde Qazaqstannyń Belgııadaǵy tótenshe jáne ókiletti elshisi Aıgúl Quspan Eýroparlamenttiń Ortalyq Azııa elderimen baılanys jónindegi delegatsııasynyń otyrysynda málimdedi.
Qurmetti qonaqtardy ıtalııalyq depýtat Fýlvıo Martýshello bastap keledi. Eýropa parlamentarııleri Májilistegi áriptesterimen ortaq taqyryptardy talqylaıdy.
Odan bólek, eýrodepýtattar Syrtqy ister, Energetıka, Indýstrııa jáne ınfraqurylymdyq damý, Ekologııa, geologııa jáne tabıǵı resýrstar mınıstrlikteriniń basshylarymen jáne Bas prokýrormen kezdesedi. Sondaı-aq, Qazaqstandaǵy Eýroodaq ókildigi uıymdastyrǵan sharaǵa qatysyp, elimizdegi adam quqyqtary jónindegi ýákilmen áńgime-dúken qurady.
«Biz Qaraǵandyǵa barýdy josparlap otyrmyz. Ol jerde meımandar Qaraǵandy oblysynyń basshylyǵymen jáne Qaraǵandy memlekettik ýnıversıtetiniń stýdentterimen kezdesedi», - deıdi Aıgúl Quspan.
Eýroparlament depýtattary Dolınka kentindegi saıası qýǵyn-súrgin qurbandaryn eske alýǵa arnalǵan mýzeıge (Karlag) soǵyp, Qaraǵandy oblysyndaǵy Qazaqstan halqy Assambleıasynyń ókilderimen pikir almasady.
«Dúnıejúzilik saýda uıymynyń mınıstrlik konferentsııasy qarsańynda, ıaǵnı bıylǵy 6-7 maýsymda Eýroparlamenttiń taǵy bir delegatsııasy Qazaqstanǵa keledi», - dep qosyp ótti qazaqstandyq dıplomat.
Maýsymda keletin qonaqtardy nemis depýtaty, Eýroparlamenttiń halyqaralyq saýda jónindegi komıtetiniń basshysy Bernd Lange bastap keledi.
Eýropalyq depýtattar Qazaqstanǵa sapar Qazaqstan men Eýropalyq Odaq arasyndaǵy baılanysty nyǵaıta túsedi degen senimde.
«Qazaqstanǵa sapar - Eýroparlamenttiń jańa quramy úshin mańyzdy qadam bolmaq. Biz Qazaqstandy osy óńirdi damytýdaǵy qozǵaltqysh kúsh dep sanaımyz. Biz bul elge Qazaqstan Prezıdenti Qasym-Jomart Toqaevtyń Brıýsselge saparynan keıin 10 kúnnen keıin baramyz. Búginde Toqaev reformamen jáne óziniń saılaý aldynda bergen ýádelerin oryndaýmen belsendi túrde aınalysyp jatyr. Eýroodaq parlamentarııleri Qazaqstan Prezıdentiniń reformalaryn qoldaıdy jáne olardy júzege asyrýǵa kómegin aıamaıdy», - dep atap ótti latvııalyq Eýroparlament depýtaty Andrıs Amerıks.
Avtor: Tımýr Dúısekeev