Eýroparlament Bolgarııanyń eýroaýmaqqa enýin maquldady

ASTANA. KAZINFORM – Eýropa parlamentiniń depýtattary (EP) Bolgarııanyń 2026 jyldyń 1 qańtarynan bastap, eýroaımaqqa enýine qoldaý bildirdi, dep habarlaıdy reseılik TASS.

Daýys berý rásimi Strasbýrgte EP plenarlyq sessııasynda ótti.

Sofııanyń eýroaımaqqa kirýi úshin qajetti talaptardy oryndaǵany týraly baıandamany 531 depýtat qoldap, 69-y qarsy daýys berdi, 79 depýtat qalys qaldy.

Eýropa halyq partııasynyń (EHP) atynan saılanǵan depýtat, Bolgarııanyń eýroaımaqqa qosylý máselesi jóninde baıandama jasaǵan Eva Maıdel Bolgarııanyń valıýta odaǵyna kirýge daıyn ekenin aıtty.

Degenmen birqatar depýtat Maıdeldiń Bolgarııa úkimeti qoldaıtyn saıası lager ókili ekenin negizge ala otyryp, daýys berýdi keıinge qaldyrýdy talap etti.

Parlament músheleriniń pikirinshe, bul jaǵdaı onyń baıandamasyna kúmán týdyrady.

- Parlament qujattardy talqylamaı jatyp qoldaı salmaı, ony tekserý kerek,-dedi «Egemendi ulttar eýropasy» ońshyl koalıtsııasynyń atynan saılanǵan depýtat Rada Laıkova. EP bul bastamany qoldamady.

Bolgarııada eýroǵa kóshý týraly sheshim narazylyq týdyrdy. 28 maýsym kúni manıfestanttar úkimettiń otstavkaǵa ketýin talap etti. Bolgarııalyq levti eýropalyq valıýtaǵa aýystyrýǵa qarsylar bul sheshimniń respýblıka men onyń ekonomıkasyna zııan jáne eldiń egemendigin shekteıdi dep esepteıdi.

Osyǵan deıin Transkaspıı halyqaralyq kólik dálizine Bolgarııa porttaryn qosý máselesi qarastyrylatyny týraly jazdyq.