Eýroparlament «áskerı Shengen aımaǵyn» qurý týraly rezolıýtsııa jobasyn daıyndady

ASTANA.KAZINFORM — Eýroparlamenttiń kólik jáne qorǵanys komıtetterinde áskerı kúshter men tehnıka qozǵalysyn jeńildetetin jáne Eýro Odaq aýmaǵynda «áskerı Shengen aımaǵyn» qurýǵa baǵyttalǵan rezolıýtsııa jobasy daıyndaldy. Bul týraly Armenpress agenttigi Eýroparlament habarlamasyna silteme jasap málimdedi.

Rezolıýtsııada «Reseıdiń yqtımal agressııasyna qarsy turýǵa daıyndyqty qamtamasyz etý maqsatynda áskerı kúshterdiń, tehnıkanyń jáne resýrstardyń búkil Eýropada jyldam qozǵalysyn qoldaý qajettiligi» atap ótilgen.

Bul qadam «Jalpy eýropalyq qaýipsizdik pen qorǵanystyń mańyzdy faktory, sonymen qatar shyǵys flangtaǵy, atap aıtqanda Baltyq elderi men Polsha úshin syndarly mańyzdy» dep kórsetilgen.

Depýtattar beıbit ýaqytta jedel áreket kúshteriniń ishki shekaralardy úsh kún ishinde, al daǵdarys kezinde 24 saǵat ishinde kesip ótý múmkindigin qamtamasyz etý qajettigin usynady. Qazirgi kezde ákimshilik, qarjylyq jáne ınfraqurylymdyq qıyndyqtar saldarynan áskerı tehnıka qozǵalysy EO aýmaǵynda keıde bir aıdan astam ýaqytqa sozylýy múmkin.

Eýroparlament depýtattary áskerı mobıldilikti qamtamasyz etýge arnalǵan bıýdjetti kelesi uzaq merzimdi bıýdjette 17 mıllıard eýroǵa deıin arttyrý usynysyn qoldaıdy jáne «EO elderinen osy somany qysqartpaýyn suraıdy, óıtkeni 2021–2027 jyldarǵa arnalǵan bıýdjette usynylǵan qarjy 75%-ǵa qysqarǵan bolatyn».

Depýtattar «naqty „áskerı Shengen aımaǵyn“ múmkindiginshe tezirek qurý kerek» dep atap kórsetedi.

Rezolıýtsııa jobasy jeltoqsan aıynda Eýroparlamenttiń plenarlyq otyrysynda daýysqa salynbaq.

Eske sala keteıik, buǵan deıin Shved depýtaty Eýroparlamentte hıdjab kııýge tyıym salýdy usynǵan boaltyn.