Eýroparlament AQSh-pen saýda kelisimi boıynsha jumysty ýaqytsha toqtatty
ASTANA. KAZINFORM — Saýda máselelerine jaýapty Eýroparlament depýtattary transatlantıkalyq qatynastardaǵy shıelenistiń kúsheıýine baılanysty AQSh-pen jasalatyn saýda kelisimi boıynsha jumysty ýaqytsha toqtatý týraly sheshim qabyldady. Bul týraly Politico basylymyna silteme jasaı otyryp, BELTA málim etti.
Basylymnyń málimetinshe, depýtattar 17 naýryz kúni kezdesip, Eýroparlamenttiń saýda jónindegi profıldik komıtetinde kelisim boıynsha daýys berý kúnin belgileý máselesin qaıta qaramaq. Eger komıtet kelisimdi qoldasa, qujat 25–26 naýryz kúnderi ótetin Eýroparlamenttiń jalpy otyrysyna shyǵarylyp, túpkilikti ratıfıkatsııaǵa usynylady.
Protsesti toqtatý sheshimi AQSh prezıdenti Donald Trump-tyń Ispanııaǵa qarsy saýda embargosyn engizý týraly qoqan-loqy jasaýynan keıin qabyldandy. AQSh basshysy Ispanııanyń óz aýmaǵynda ornalasqan áskerı ushaqtardy Iranǵa soqqy jasaý úshin paıdalanýǵa ruqsat bermegenine narazylyq bildirgen.
Buǵan deıin ótken jazda jasalǵan kelisim Eýropalyq odaqtyń amerıkalyq taýarlarǵa 15 paıyzdyq baj salyǵyn qoldanýyn kózdeıtini habarlanǵan bolatyn. Qujatty ratıfıkatsııalaý buǵan deıin eki ret keıinge shegerilgen bolatyn. Qańtar aıynda Grenlandııaǵa qatysty jaǵdaıǵa baılanysty odan keıin aqpanda AQSh ákimshiligi jahandyq kedendik bajdardy 10 paıyzdan 15 paıyzǵa deıin kóteretinin jarııalaǵan tusta shegerildi.
Aıta keteıik, buǵan deıin Eýroparlament Eýropadaǵy turǵyn úı daǵdarysyn eńserýge kiriskenin jazǵan bolatynbyz.
