Eýropanyń talǵamy bıik kórermeni aldynda qazaq mádenıetin nasıhattaý úshin barlyǵyn jasaýǵa tıispiz - M. Qul-Muhammed
A. Qarashanyń 18-i. QazAqparat /Qanat Mámetqazyuly/ ‑ Eýropanyń talǵamy bıik kórermeni aldynda qazaq mádenıetin nasıhattaý úshin barlyǵyn jasaýǵa tıispiz.
Búgin QR Mádenıet jáne aqparat mınıstrliginiń keńeıtilgen alqa májilisi barysynda vedomstva basshysy Muhtar Qul-Muhammed Qazaqstannyń EQYU-ǵa tóraǵalyq etý barysyndaǵy sharalarǵa toqtala otyryp, osylaı málim etti, dep habarlaıdy QazAqparat.
«Qazaqstannyń Eýropadaǵy qaýipsizdik pen yntymaqtastyq uıymyna tóraǵalyq etý aıasynda mınıstrliktiń atqaratyn jumystary negizgi úsh baǵytty qamtıtyn bolady. Birinshiden - bul elimizdiń ulttyq-mádenı erekshelikterin, ózindik ulttyq ónerimizdi Eýropanyń úlken sahnalaryna shyǵarý. Biz Eýropanyń talǵamy bıik kórermeni aldynda qazaq mádenıetin nasıhattaý úshin barlyǵyn jasaýǵa tıispiz. Buǵan qatysty daıyndyq jumystar da bastalyp ketti. Ekinshiden - elimizdiń tóraǵalyǵy jumystaryn aqparattyq jaǵynan qamtý máselesi de mańyzdy bolyp tabylady. Bul jumystar Syrtqy ister mınıstrligimen birlesip atqarylady. Úshinshiden - EQYU tóraǵalyǵyna bıliktiń ǵana emes, úkimettik emes sektor tarapynyń belsendiligi, olardyń sharalarǵa atsalysýlary qajet. Qazaqstanda azamattyq qoǵamnyń berik ornyqqandyǵyn, bılik pen úkimettik emes sektor arasynda shynaıy áriptestik ornaǵanyn eýropalyq deńgeıde kórsetýge tıispiz», dedi M. Qul-Muhammed.
