Eýropanyń Shengen aımaǵyna taǵy 2 memleket kirýi múmkin

BRıÝSSELЬ. QazAqparat - Eýroparlament Eýropalyq Odaqqa múshe memleketterdi Rýmynııa men Bolgarııanyń Shengen aımaǵyna qosylýyna ruqsat berýge shaqyrdy, dep habarlaıdy QazAqparat tilshisi.

Seısenbi kúni Strasbýrgte (Frantsııa) ótken plenarlyq otyrys barysynda qabyldanǵan qararda Eýroparlament depýtattary Eýropalyq keńes Rýmynııa men Bolgarııanyń Shengen aımaǵyna qosylýy týraly sheshimdi 2022 jyldyń sońyna deıin qabyldaýy tıis ekenin atap ótti.

Bul 2023 jyldyń basynan bastap eki eldiń barlyq ishki shekaralarynda betpe-bet tekserýdiń joıylýyn qamtamasyz etýi tıis. Qaýlyny 547 depýtat qoldasa, 49-y oǵan qarsy shyqty, taǵy 43 depýtat daýys berýden qalys qaldy.

Shengen aımaǵy «Eýroodaqtyń uly jetistikteriniń biri» ekenin atap ótken Eýroparlament depýtattary Eýropalyq keńesti qajetti sharttardy áldeqashan oryndaǵan Bolgarııa men Rýmynııany qabyldaý týraly sheshim shyǵarmaǵany úshin synǵa aldy.

Depýtattardyń aıtýynsha, ishki shekaralyq baqylaýdy saqtaý kemsitýshilik bolyp tabylady jáne qozǵalystaǵy jumysshylar men azamattardyń ómirine kúrdeli áser etedi. Olardyń pikirinshe, ımport, eksport jáne júk porttarynan taýarlardyń erkin aǵynyna kedergi jasaý arqyly olar EO ortaq naryǵyna da zııan keltiredi.

Qazirgi ýaqytta Bolgarııa, Horvatııa, Kıpr, Irlandııa jáne Rýmynııany qospaǵanda, EO-nyń barlyq múshe memleketteri Shengen aımaǵynyń bóligi bolyp tabylady. Olardyń arasynda EO-ǵa quramyna kirmeıtin elder Islandııa, Norvegııa, Shveıtsarııa jáne Lıhtenshteın de bar.

Ashyq kózderden alynǵan foto