Eýropanyń ortalyq aımaqtarynan bastalǵan sý tasqyny Vengrııaǵa jaqyndady
ASTANA. 6 maýsym. QazAqparat - Dýnaı ózenindegi sý deńgeıiniń kóterilýine baılanysty Vengrııanyń Býdapesht qalasynda sý tasqynyna daıyndyq sharalary kúsheıtildi.
Vengrııanyń Іshki ister mınıstrligi habarlaǵandaı, aldaǵy ýaqytta Dýnaı ózeniniń deńgeıi 8 metr 75 santımetrge deıin kóteriledi. Bul 2002 jyly bolǵan tabıǵı apat kórsetkishinen 26 santımetrge joǵary. Eldiń premer-mınıstri Vıktor Orbannyń aıtýynsha, Býdapesht qalasyna kele jatqan sý massasy azamattardyń ómirine úlken qaýip tóndirip otyr. «Jaqyn arada qala halqynyń deni qaýipsiz jerge kóshirilýi múmkin», - deıdi ol.
Aıta keteıik, Eýropadaǵy sý tasqyny qurlyqtyń ortalyq aımaqtarynan bastalyp, Chehııa, Polsha, Germanııa men Avstrııany jaılady. Endi, bul qaýip Dýnaı ózeni boıymen tómen ornalasqan Vengrııa, Slovakııa, Serbııa, Bolgarııa sııaqty memleketterge tónip tur.
