Eýropanyń keıbir memleketteri koronavırýsqa qarsy vaktsınany egý merzimin uzartyp jatyr
NUR-SULTAN. QazAqparat - Eýropanyń keı elderiniń bıligi COVID-19-ǵa qarsy vaktsınalardyń 1-shi jáne 2-shi komponentin engizý merzimin uzartyp jatyr, dep habarlaıdy QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram kanalyna silteme jasap.
Italııada alǵashqy vaktsınalaý men revaktsınalaý arasyndaǵy úzilisti arttyrý týraly norma bekitildi. Endi dozalar arasyndaǵy merzim 21 jáne 28 emes, 42 kúndi quraıdy. Bul Pfizer jáne Moderna vaktsınalaryna qatysty belgilengen.
El bıliginiń aıtýynsha, komponentterdi engizý arasyndaǵy ýaqytty eki ese uzartý birinshi kezeńde ekpemen biraz adamdy qamtýǵa múmkindik beredi. Apennın túbeginde vaktsınany jetkizý boıynsha máseleler áli de bar.
Italııada aǵymdaǵy jyldyń qańtarynda birinshi kezekte dárigerler, qarttar men qarttar úıiniń qyzmetkerleri vaktsına qabyldaı bastady. Jappaı ekpe salý tegin jáne erikti túrde júrgizilýde, dese de el bıligi otandastaryna vaktsınatsııa jasaýǵa keńes beredi. Sebebi egý naýqany josparlaǵannan baıaý júrýde. Negizgi sebepterdiń biri — vaktsınalardy jetkizýdegi irkilister.
2021 jyldyń sońyna deıin Italııa halqynyń 90% - yn egý josparlanǵan. Sáýir aıynyń ortasyndaǵy málimetterge sáıkes, Italııada «koronavırýs pnevmonııasy» dıagnozy rastalǵan 110 myńnan astam adam kóz jumdy.
El ǵalymdary men saıasatkerleriniń bastamasymen reseılik «Spýtnık V» vaktsınasyn satyp alý máselesi talqylanýda, sondaı-aq ony Italııada óndirý kózdelýde.
Ispanııa eli de AstraZeneca vaktsınasynyń dozalary arasyndaǵy aralyqty edáýir arttyrdy. 60 jasqa deıingi adamdar úshin tórt jáne 12 aptadan 16 aptaǵa deıin uzartty dep habarlaıdy Reuters.
Ispanııa Eýroodaq memleketteri arasynda 2 komponentti engizý arasyndaǵy ýaqytty 12 aptadan asa ýaqytqa sozǵan birinshi el.
Densaýlyq saqtaý mınıstrligi ruqsattyń áreket etý merzimin uzartý vaktsınany qoldanýdyń eń qaýipsiz ádisin anyqtaýǵa múmkindik beretindigin málimdedi. Bastapqyda AstraZeneca preparaty 18-65 jas aralyǵyndaǵy jumysshylarǵa salyndy, jas adamdarda qan uıyp qalý qaýpiniń týyndaýyna baılanysty vaktsına tek 60 jastan asqan adamdarǵa salýǵa ruqsat etildi. Bıliktiń mundaı qadamy birinshi dozany alǵan keı jastardyń ekinshi dozany alý múmkindigin joǵaltýyna ákeldi.
Dozalar arasyndaǵy aralyqty ulǵaıtý bılikke atalǵan toptardaǵy adamdar úshin AstraZeneca nemese ózge vaktsınanyń ekinshi komponentin qabyldaý ne qabyldamaý týraly sheshim shyǵarmas buryn ártúrli vaktsınalardy aralastyrý synaqtaryn baǵalaýǵa múmkindik beredi.
