Eýropanyń Islam uıymdary Mıanma musylmandarynyń taǵdyryna alańdaýshylyq bildirýde
ASTANA. 3 tamyz. QazAqparat - Eýropa Islam Uıymdarynyń Federatsııasy (FIOE) Mıanma musylmandarynyń taǵdyryna alańdaýshylyq bildirip, halyqaralyq qaýymdastyqtan osy eldegi qantógisti toqtatý isine aralasýdy talap etti, dep jazady www.muslim.kz saıty.
Federatsııa málimdemesinde: «Musylman-rohınıalyqtardyń azamattyq quqyqtary tolyq aıaq asty etilip, memleket olarǵa qatysty ekstremıstik ıdeologııa ustanýda jáne olardyń elden bosyp ketýin talap etip otyr», - delingen. Eýropa Islam Uıymdarynyń Federatsııasy osy dinı-etnıkalyq top ókilderin aıaýsyzdyqpen qyrý men qýdalaý olardyń birjola joıylyp ketýine jol ashýy múmkin dep qaýip bildirýde.
«EO pen halyqaralyq uıymdar aıýandyqty toqtatý úshin óz ustanymdaryn qatań túrde bildirýi tıis. Bulaı kóz jumyp otyra berýge bolmaıdy. Halyqaralyq qaýymdastyq jappaı jazalaýǵa negizdelgen osyndaı suraqy saıasattyń qandaı qateri baryn jáne sharalar qabyldaýdy keshiktirýdiń saldary qanshalyqty aýyr bolatynyn jaqsy biledi», - dep saqtandyrady FIOE. Federatsııa eýropalyq musylmandardy Mıanmadaǵy baýyrlaryn qoldaý sharalaryn ótkizýge jáne bosqyndar men olardyń otbasylaryna aqsha jınaýǵa shaqyrdy. Mıanmadaǵy bassyzdyqqa baılanysty Adam quqyqtaryn baqylaý jónindegi uıym da dabyl qaǵyp, arnaıy baıandama ázirledi. Onda Mıanma úkimetin dinı-etnıkalyq negizdegi qaqtyǵysty retteýdegi áreketsizdigi úshin aıyptady. Jergilikti bılik Arakan provıntsııasyndaǵy 100 myń musylman bosqyndy syrt álemnen oqshaýlap tastaǵan. Olarǵa azyq-túlik, baspana men dárigerlik kómek aýadaı qajet.
Baıandamada: «Ásker ozbyr tobyrdy kúshpen basqan syńaı tanytty, biraq kýágerlerdiń aıtýynsha, úkimet sarbazdary shekten shyqqan adamdardyń musylmandardy óltirip, aýyldardy órtegenine qol qýsyryp qarap turǵan», - dep jazylǵan.
Quqyq qorǵaýshylar Mıanma úkimeti óz áskeriniń taǵylyq áreketterin tez arada toqtatyp, gýmanıtarlyq kómek jetkizýdi qamtamasyz etip jáne sheteldik táýelsiz baıqaýshylardy jiberýge jaǵdaı jasaýy tıis dep málimdedi.
