Eýropanyń ejelgi kınoteatrynda «Juldyzdar toǵysqanda» fılmi kórsetildi

STRASBÝRG. QazAqparat – Qazaqstan Respýblıkasy Táýelsizdiginiń 30 jyldyǵy men Túńǵysh Prezıdent kúnin merekeleý qurmetine Eýropanyń ejelgi kınoteatrynda «Juldyzdar toǵysqanda» fılminiń kórsetilimi ótti, dep habarlaıdy QazAqparat menshikti tilshisi.

Sharany Strasbýrg qalasyndaǵy QR Bas konsýldyǵy Frantsııadaǵy Qazaqstan kınosy kınofestıval qaýymdastyǵymen birlesip, 1913 jyldan beri jumys istep kele jatqan «Odısseı» kınoteatrynda uıymdastyrdy.

Frantsııanyń Úlken Shyǵys aımaǵynyń jáne Strasbýrg qalasynyń resmı tulǵalary, Eýropa Keńesiniń ókilderi, Eýropa Parlamentiniń depýtattary, shet el elshileri men dıplomattary, frantsýz stýdentteri men jýrnalısteri Qazaqstannyń kópǵasyrlyq damý tarıhymen, qazaq memleketin qalyptastyrýdyń mańyzdy kezeńderimen tanysty.

Bas konsýl Ánýarbek Ahmetov óz sózinde sheteldik qonaqtarǵa osy kınofılmde erekshe kórsetilgen Táýelsiz Qazaqstannyń qalyptasýyndaǵy Tuńǵysh Prezıdent – Elbasy Nursultan Nazarbaevtyń róli týraly aıtyp berdi.

2019 jylǵy maýsymda saılanǵan Qazaqstan Prezıdenti Qasym-Jomart Toqaev qazirgi ýaqytta respýblıkanyń odan ári demokratııalyq damýyna baǵyttalǵan aýqymdy saıası jáne áleýmettik-ekonomıkalyq reformalar júrgizip jatqany atap ótildi.

Sondaı-aq, qonaqtar Qazaqstannyń táýelsizdik jyldaryndaǵy saıası, ekonomıkalyq jáne mádenı-gýmanıtarlyq damý salasyndaǵy jetistikterine arnalǵan fotosýret kórmesimen tanysty.