Eýropanyń eki qalasynda Abaı atyndaǵy mádenı-aqparat ortalyǵy ashylady

NUR-SULTAN. QazAqparat – Mádenıet jáne sport mınıstri Aqtoty Raıymqulovanyń aıtýynsha, Cheh ulttyq kitaphanasynda «Abaı» mádenı-aqparat ortalyǵy ashylyp qoıǵan. Dál osyndaı taǵy eki ortalyq jýyq arada Býdapesht jáne Bratıslava qalalarynda ashylady, dep habarlaıdy QazAqparat tilshisi.

«2020 jyl Abaıdyń - 175, Ábý Nasyr ál-Farabıdiń - 1150 jyldyǵy jáne Altyn Ordanyń qurylǵanyna 750 jyl tolýy sııaqty mańyzdy merekelik is-sharalarǵa toly. Abaı – halqymyzdyń kórnekti aqyny jáne oıshyly, onyń fılosofııasy mádenı jáne ulttyq biregeıliktiń ajyramas bóligine aınaldy. Memleket basshysy atap ótkendeı, jalpy respýblıkalyq jospardyń barlyq is-sharalary ıdeologııalyq jáne aǵartýshylyq júktemeni kóteredi. Mereıtoıdyń kún tártibi tujyrymdamalyq turǵydan elde jáne shetelde Abaı tulǵasynyń jahandyq aýqymyn keńinen tanymal etýge arnalǵan ıdeologııalyq-mazmundy jáne sapaly is-sharalardy ótkizýge negizdeledi», - dedi Aqtoty Raıymqulova Mádenıet jáne sport mınıstrliginiń keńeıtilgen alqa májilisinde.

Mınıstrdiń aıtýynsha, búgingi tańda Abaı toıyn ótkizý boıynsha óńirlik jospar bekitilgen. L.N. Gýmılev atyndaǵy Eýrazııa ulttyq ýnıversıtetiniń bazasynda «Abaı akademııasy» ǵylymı-zertteý ınstıtýty qurylǵan.

«27 qańtarda Cheh Ulttyq kitaphanasynda Abaı atyndaǵy mádenı-aqparattyq ortalyq ashyldy. Osyndaı ortalyqtar Býdapesht jáne Bratıslava qalalarynda ashylady», - dedi ol.