Eýropanyń biryńǵaı aqshasy tsıfrlyq valıýtaǵa aınalady

ASTANA. QazAqparat – Brıýssel elektrondy eýrony aınalymǵa engizýdi usyndy. Tsıfrlyq biryńǵaı valıýtaǵa Eýropa ortalyq banki ruqsat berýi kerek, dep habarlaıdy QazAqparat Euronews agenttigine silteme jasap.

Kúndelikti qarjy operatsııalaryna tsıfrlyq quraldardy paıdalanatyn adamdar kúnnen kúnge artyp keledi.

Osyǵan oraı Brıýssel keshe elektrondy eýrony aınalymǵa engizýdi usyndy.

Eýrokomıssııanyń vıtse tóraǵasy Valdıs Dombrovskıs tsıfrlyq biryńǵaı eýropa valıýtasy qazirgi qaǵaz, metall jáne karta túrindegi tólem tásilderine balama sheshim retinde búkil eýroaımaq tutynýshylaryna usynylatynyn aıtty:

«Adamdar tsıfrlyq eýromen «qoǵamdyq» qarjy sekildi tóleı beredi. Ereksheligi sol – onlaın da, oflaın da tólem jasaýǵa bolady. Telefonyńyzda tolyqtyryp otyrýǵa bolatyn eýroámııannyń bolýy – qaltańyzda tıyn men banknottyń bolǵanymen birdeı. Tóleý de jeńil bolmaq. Sizge tipti ınternetke qosylýdyń da qajeti joq».

Eýroodaq deregi boıynsha, EO azamattarynyń 55% qolma-qol aqshasyz tólem jasaýdy qup kóredi, 22% qolma-qol aqshamen tólegendi qalasa, 23%-ne báribir.

Elektrondy eýrony engizý týraly usynysqa qarjy isteri men jınaqtaryna banktiń aralasýynan qorqatyn adamdar narazy boldy.

Biraq Brıýssel bolashaq júıeniń barlyq elementteri tolyqtaı qaýipsiz bolady dep sendirip otyr.

Bul zańdy Eýroparlament qabyldap, EO-ǵa múshe elder maquldaýy kerek.

Eýropa ortalyq banki qazanda tsıfrlyq valıýtaǵa ruqsat berip, ol 2027 jyly iske qosylady degen boljam bar.