Eýropanyń birqatar elinde qus tumaýy órship tur

KOPENGAGEN. QazAqparat – Nıderlandy elinde qustyń júzdegen myń basy joıylǵannan keıin Danııa men Frantsııada qus tumaýynyń oqıǵalary tirkelgen, dep habarlaıdy QazAqparat Merco Press-ke silteme jasap.

Frantsııanyń Korsıka aralynda vırýs anyqtalǵan soń, onda júzdegen taýyq óltirildi, al danııalyqtar eldiń batysynda vırýs órshigen soń, onyń taralýyn toqtatý úshin 25 myńnan astam qustyń kózi joıylǵanyn málimdedi.

Frantsııa ulttyq qorǵanys sharalary týraly buıryq berdi, sonyń ishinde úı qustaryn jabaıy qustardan mindetti túrde oqshaýlap ustaý talaby bar, al Danııa taýyq jumyrtqasyn EO syrtyna esporttaýdy toqtatty.

Adam úshin qaýipti emes, biraq aýylsharýashylyq salasyn talqandaýshy bolatyn qus tumaýy oqıǵalary Belgııa, Nıderlandy, Irlandııada, sondaı-aq basqa elderde de tirkelgen. Osy aıda Nıderlandy bıligi vırýs saldarynan 200 myńnan astam qustyń joıylǵanyn málimdegen bolatyn.

Frantsııanyń ońtústik-batysyndaǵy úırek baǵýshylar sońǵy jyldary qus tumaýynan eki ret zardap shekken. Vırýs juqtyrǵan qustardy jappaı joıý saldarynan olar júzdegen mıllıon eýrodan aıryldy.

Danııa sharýalardy qustaryn tumaýdan qorǵap qalýǵa shaqyrdy.

Aıta ketsek, taıaýda Danııada keıbireýleriniń koronavırýs ınfektsııana shaldyqqany anyqtalǵan soń, mıllıondaǵan qarakúzen joıylǵan.