Eýropany kókteı ótken avtosherý Almatyda aıaqtaldy
ALMATY. 20 shilde. QazAqparat /Ádilet Musahaev/ - Búgin QR Táýelsizdiginiń 20 jyldyǵyna, QR QK Aeroutqyr áskerleriniń 11 jyldyǵyna jáne Áýe-desanttyq áskerleriniń 81 jyldyǵyna arnalǵan «Eýropa-Azııa» avtosherýi óz máresine jetti.
Atalǵan avtosherýdiń qatysýshylary Eýropanyń barlyq elin aralap, ózderiniń saparyn Almaty qalasynda aıaqtady. Qapshaǵaı baǵytynda kele jatqan avtosherýdi jol polıtsııasy qyzmetkerleri kútip alyp, 28 gvardııashy-panfılovshylar saıabaǵyna deıin shyǵaryp saldy. Odan ári sherýge qatysýshylar men «Nur Otan» partııasynyń basshylyǵy Máńgi alaý memorıalyna gúl qoıý rásimin ótkizdi.
«Bul avtosherý patrıottyq ıdeologııany tereń nasıhattaýshy shara bolyp tabylady», -dep atap ótti Almaty qalasyndaǵy «Nur Otan» HDP tóraǵasynyń orynbasary Sanjar Boqaev.
Sharanyń negizgi maqsaty - dostyq, aǵaıyndyq pen ultaralyq kelisim ıdeıalaryn nasıhattaýǵa, óz Otanyn súıý rýhynda óskeleń urpaqtyń patrıottyq tárbıesin nyǵaıtý. Sonymen qatar QR Qarýly Kúshteri ımıdji men áskerı qyzmet áleýetin arttyrýǵa baǵyttalǵan.
Atalǵan shara «Nur Otan» HDP, «Desant baýyrlastyǵy» áýe-desant áskeriniń ardagerler odaǵy jáne QR jergilikti soǵys jáne Aýǵanstan aradagerleriniń odaǵy, QR Qarýly Kúshteriniń Qurylyq áskerleri qolbasshylyǵynyń qoldaýymen ótti.
