Eýropany baǵyndyrǵan jas karateshi: Jattyǵýdan sharshap shyqqan – keremet sezim

- Áńgimemizdi týyp-ósken jerińizden bastasaq.

- 2004 jyly Óskemende týdym. Qaladaǵy №8 mektepti bitirgen soń S.Amanjolov atyndaǵy Shyǵys Qazaqstan ýnıversıtetine «Dene shynyqtyrý jáne sport» mamandyǵyna oqýǵa tústim. Bıyl birinshi kýrsty aıaqtadym.

- Karatege qatysýyńyzǵa ne túrtki boldy?

- Bir kúni mektepke karate úıirmesiniń bapkerleri keldi. Bizdi osy sport túrimen tanystyryp, jadynamalar taratty. Sodan birden qyzýshylyǵym oıanyp, úıge barǵan soń áke-shesheme karatege qatysqym keletinin aıttym.

Olar qarsylyq tanytpaı, qoldaý bildirdi. Sóıtip, 8 jasymda kıokýshınkaı-kan karate úıirmesine jazyldym.

Bıyl osy sport túrimen aınalysyp kele jatqanyma 10 jyl toldy. Alǵashqy bapkerim Álııa degen kisi boldy. Ol kishi topty jattyqtyrady. 11 jasqa tolǵannan bergi bapkerim – Rýslan Alshymbaev.

Karateden bólek, komandalyq sportty, atap aıtqanda fýtbol men voleıboldy unatamyn. Bos ýaqytymda dostarymmen aýlada oınap turamyz.

- Sportta jetken jetistikterińiz qandaı?

- Kıokýshın kaı-kan karate boıynsha Qazaqstan Respýblıkasynyń tórt dúrkin chempıony atandym. 2017 jyly Rýmynııanyń Býharest qalasynda ótken XVI Eýropa chempıonatynda chempıon boldym. Bul saıysqa 22 eldiń «sen tur men ataıyn» degen sportshylary qatysty. 12-13 jasqa deıingi jasóspirimder arasynda 40 kelige deıingi salmaqta baq synastym.

Barlyǵy 3 kezdesý ótkizdim. Alǵashqysynda jarys qojaıynymen jekpe-jekke shyqtym. Ońaıǵa soqpady. Biraq namysqa tyrysyp, qolymnan kelgenshe nyq soqqylar jumsadym. Ekinshi qarsylasym reseılik sportshy boldy.

Jekpe-jek barysyn baqylaýda ustap, jeńip shyqtym. Fınalda taǵy da Reseı Federatsııasynan kelgen karateshimen kezdestim. Negizgi ýaqytta ekeýimiz teń tústik. Sodan soń qosymsha ýaqyt berildi. Barymdy salyp, jeńis tuǵyrynan kórindim.

Sondaı-aq 2018 jyly Ýkraınanyń Odessa shaharyndaǵy Álem chempıonatynan ekinshi oryn buıyrdy. Dál osy jyly elordada bolǵan Azııa chempıonatynda top jardym. 2019 jyly Qytaıdyń Shanhaı qalasyndaǵy Azııa chempıonatynda da chempıon boldym.

Qazirgi belbeýim – japsyrmasy bar qońyr tústi. Osydan keıingisi – qara tústi belbeý. Sońǵy mejeni bıyl baǵyndyrýdy josparlap otyrmyn.

- Kúnine neshe saǵat daıyndalasyz?

- Kún saıyn tańerteń kross júgiremiz. Kem degende 7 shaqyrymdy júgirip ótýimiz kerek. Keshke 2 saǵat daıyndalamyz. Al jarysqa barar aldynda kúnine 2 ret, tańerteń jáne keshke eki saǵattan daıyndyq jasaımyz.

Tehnıkamyzdy shyńdap, uryp-soǵýdyń, tebýdiń túrli amal-tásilderin meńgeremiz, qaıtalaımyz, sparrıngke shyǵamyz. Jattyǵý sońynda súmek bop terlep, qol-aıaǵyń ábden talady. Bul degen keremet sezim ǵoı.

- Qandaı da bir dıeta ustaısyz ba?

- Erekshe bir dıeta joq. Chıps pen koka kola, fastfýd sekildi zııandy taǵamdardy tutynbaımyn. Jarysqa barar aldynda salmaq qýalaımyz. Sol kezde bapker ne je deıdi, sony jeımiz. Atap aıtqanda, botqa, qaraqumyq, taýyq súbesi, túrli salattar.

- Karatede úırengenińizdiń kúndelikti ómirde óz paıdasyn tıgizgen kezderi boldy ma?

- «Eń jaqsy tóbeles - bolmaǵan tóbeles» deıdi ǵoı. Kıkiljiń, ereges týyndap jatsa sózben sheshýge tyrysamyn. Al eger odan nátıje shyqpasa, úırengenimizdiń kómegi tıedi. Er jigit jaqyndaryn, baýyr-qaryndastaryn qorǵaı bilýi kerek qoı.

Jalpy sport degen adamǵa senimdilik syılaıdy. Sportpen aınalysqan bala minezdi bolyp ósedi. ıAǵnı, ózi úshin jaýap bere alady, árkez oıyn qoryqpaı aıtady.

Eger balańyzdy qandaı da bir sport túrine berseńiz, ol sol jerden birinshi kezekte tárbıe alyp shyǵatynyna senimdi bolyńyz. Bapkerler bizdi sportqa baýlyp qana qoımaı, ómirlik prıntsıpterdi úıretip, jaqsy qabiletterdi boıymyzǵa sińiredi.

- Búginde oblys boıynsha balalardyń karatege degen qyzyǵýshylyǵy qalaı?

- Qazir bizdiń topta 30-40 shaqty bala jattyǵyp júr. Basqa toptarda da adam óte kóp. Eń az degende – 20. Al buryn olaı bolmaǵan. 2012 jyly men alǵash qatysa bastaǵanda bir topta tek 5-6 baladan edi.

Elimizdiń basqa óńirlerinde de osyndaı jaǵdaı eken. Soǵan qaraǵanda, Qazaqstanda karatege degen qyzyǵýshylyq artyp kele jatyr deýge bolady.

- Áńgimeńizge kóp rahmet!