Eýropanyń úzdik klýbtarynda oınaǵym keledi – atyraýlyq qaqpashy qyz
ATYRAÝ. KAZINFORM – Atyraýda 8-synypta oqıtyn qyz uldar komandasynyń qaqpasyn qorǵap júr.
Bul óńirde fýtboldan qyzdar komandasy qurylmaǵan. Biraq «RealSportAcademy» uldar komandasynyń qaqpasyn qorǵaıtyn qaqpashy qyz bar. Aty-jóni – Dılnaz Barsaeva.
Ol bes jasynan fýtbolǵa qyzyp, uldarmen birge dop oınaı bastaǵan. Tórt jyl buryn «RealSportAcademy» fýtbol klýbynyń quramyna alynǵan.
«Qyzdardyń qyzyǵýshylyǵy ózgeshe bolady ǵoı. Meniń ańsarym fýtbolǵa aýdy. Maqsatym – buqaralyq sportty, onyń ishinde fýtboldyń qyzdarǵa jat emesin dáleldeý. Árıne, jetistikke jetýdi kózdep júrmin. Bul oıyma ákem-sheshem qoldaý bildirdi», - deıdi Dılnaz Barsaeva.
Qaqpashy bolý ońaı emes. Óıtkeni, komandanyń jeńisi de, jetistigi de sonyń sheberligine de baılanysty bolady. Sony sanasyna sińirgen Dılnaz qaqpany qorǵaýdyń qyr-syryn úırenip júrgenin aıtady.
«Jattyǵý kezinde dopty ustaý tehnıkasyna mán beremin. Tipti qaqpaǵa tebilgen doptyń traektorııasyn bilý kerek. Qulaýdy úırenip aldym. Eń bastysy, jyldamdyq pen qyraǵylyq tanytýda qatelespegen jón», - deıdi qaqpashy qyz.
«RealSportAcademy» fýtbol klýbynyń jetekshisi Berik Muratáliulynyń aıtýynsha, Qazaqstan fýtbol federatsııasynyń bastamasymen 2021 jyly jeke klýbtardyń respýblıkalyq lıgasy qurylǵan. Fýtbol klýbynyń qaqpashysy Dılnaz Barsaeva byltyr atalǵan lıgada úzdik qaqpashy atandy.
«Fýtbol klýbynyń Instagram paraqshasyna «Qyzdardy qabyldaısyzdar ma?» degen pikir jazyldy. Ony Dılnaz jazǵan eken. Alǵashynda tańdanǵanym ras. Keıin ony osy jerge shaqyrdym. Klýbqa ákesimen birge keldi. Qaqpashy bolǵysy keletinin aıtty. Pysyq eken, karateden biraz jetistigi bar. Ol – shapshań qımyldaıtyn, qaısar qyz. Aldaǵy jyly shetelde ótetin jarysqa jiberýdi josparlap otyrmyz», - deıdi Berik Muratáliuly.
Qazir qaqpashy qyz Nazarbaev zııatkerlik mektebiniń 8-synybynda oqıdy. Hımııa men ınformatıka pánderin unatady. Biraq bolashaǵyn fýtbolmen baılanystyrǵysy keledi.
«Ár sporttyń óz erejeleri men talaptary bar. Sol sebepti uldar komandasynda udaıy oınaı almaıtynymdy bilemin. Aldaǵy ýaqytta qyzdar komandasyna aýysqym keledi. Sheberligimdi shydaı túsip, elimizdiń jáne Eýropanyń úzdik klýbtarynda, ulttyq qurama sapynda oınaǵym keledi. Bul – meniń armanym», - deıdi ol.
Eske sala ketelik, buǵan deıin Atyraýda 12 myń jankúıerge arnalǵan stadıon salynatynyn jazǵan edik.
