Eýropanyń ońtústik bóliginde aptap ystyqtan orman órti órship tur

ASTANA. KAZINFORM – Frantsııa, Ispanııa, Gretsııa jáne Túrkııada aýa temperatýrasy rekordtyq 42 gradýstan joǵary kóterilip, sonyń saldarynan orman órtteri órshidi, dep habarlaıdy Euronews.

Órt sóndirýshiler aptap ystyq saldarynan Ońtústik Eýropada bolyp jatqan orman órtterimen kúresip jatyr.

Frantsııada senbi kúni 1400-ge jýyq órt sóndirýshi sońǵy onjyldyqtaǵy iri órttiń órshýiniń aldyn alý úshin ońtústik Od departamentine jumyldyryldy. Soǵan qaramastan jergilikti turǵyndardyń úılerine barýyna ruqsat berildi.

Óńirdiń prefekti Krıstıan Pýje sharap óndirisimen tanymal aımaqta 160 sharshy kılometr jerdi órt shalǵannan keıin órttiń aýyzdyqtalǵanyn málimdedi.

- Joldardyń barlyǵy ashyq, alaıda bılik turǵyndardyń ormanǵa barýyna qatań tyıym saldy, - dedi Pýje senbi kúni ótken baspasóz máslıhatynda.

- Órtpen kúres jalǵasyp jatyr. Órt sóndirýshiler órttiń qaıta órshýiniń aldyn alý úshin jumys júrgizip jatyr, - dedi ol.

- Bir adam mert bolyp, 25 adam jaraqat aldy. Olardyń ishinde 16 órt sóndirýshi bar, - dep qosty Pýje.

Jaqyn kúnderi bolatyn joǵary aýa temperatýrasy jumysty qıyndatýy múmkin.

- Órt birneshe aptada tolyq sónbeıdi,-dedi Od órt sóndirýshiler departamentiniń dırektory, polkovnık Krıstof Manı. Ol qazir erekshe kóńil bólinip otyrǵan birneshe qaýipti aımaq týraly aıtty.

Frantsııanyń ulttyq meteorologııalyq agenttigi Meteo France eldiń ońtústik bóliginde qatty ystyqqa baılanysty joǵary daıyndyq rejımin jarııalady. Senbi kúni Od departamentinde aýa temperatýrasy 39°C-qa deıin jetken.

Ispanııa men Gretsııada ormandar áli órtenip jatyr

Senbi kúni órt sóndirýshiler Ispanııanyń ortalyǵyndaǵy Avıla provıntsııasynda orman órtimen kúresti jalǵastyrdy.

Órt juma kúni bastalǵan. Ispanııanyń tótenshe jaǵdaılar jónindegi áskerı bólimshesi (UME) túni boıy jumys istep, órtti baqylaýǵa alýǵa jáne onyń joldar men temirjol jelilerine jaqyndaýyna jol bermeýge tyrysty.

Ispanııa men Portýgalııanyń keıbir aımaqtarynda aýa temperatýrasy 39°C-qa deıin jetken jaǵdaıda, órttiń shyǵý qaýpi artady.

Grekııada juma kúni tústen keıin Kerateıada (Afınydan shamamen 40 shaqyrym ońtústik-shyǵys baǵytta) bastalǵan iri orman órti shyǵys jáne ońtústik Attıkada túnge deıin jalǵasyp, turǵyn úılerge aıtarlyqtaı zııan keltirdi jáne bir adamnyń ómirin qıdy.

Túrkııadaǵy orman órti oqshaýlandy

Túrkııanyń aýyl sharýashylyǵy jáne orman mınıstri Ibrahım ıÝmaklıdiń aıtýynsha, eldiń batysyndaǵy Chanakkale men Baıramychtyń ortalyq aımaqtaryndaǵy orman órtteri negizinen baqylaýǵa alyndy.

ıÝmaklı órttiń taralýyn toqtatý úshin órt sóndirýshiler túni boıy jumys istegenin aıtty. Ol órttiń toqtatylǵanyn jáne zardaptardy joıý jumystary júrip jatqanyn jetkizdi.

Juma kúni Iıgıtler aýylynyń mańynda bastalyp, qatty jeldiń áserinen ormanǵa taraǵan órt saqtyq sharasy retinde Sakaklı, Ahmetchelı, Dogancha, Zeıtınlı jáne Pıtırellı aýyldarynyń turǵyndaryn evakýatsııalaýǵa sebep boldy.

Jalpy 654 turǵyn qaýipsiz aımaqtarǵa kóshirildi. Bılik órttiń shyǵý sebepterin tergeý aıasynda tórt kúdiktiniń qamaýǵa alynǵanyn habarlady.

Osyǵan deıin Italııada Vezývıı ulttyq saıabaǵy órtengeni týraly jazdyq.