Eýropanyń ońtústiginde orman órti órship tur
ASTANA. KAZINFORM – Órt Eýropanyń ońtústiginde myńdaǵan adamdy evakýatsııalaýǵa májbúr etip, úlken shyǵynǵa ushyratty. Jalynmen kúreske kontınentke jetken qatty aptap ystyq kedergi keltirip otyr, dep habarlaıdy Euronews.
Grekııanyń kólemi jaǵynan úshinshi qalasy Patryǵa qaýip tónip tur. Órt sóndirýshiler qazirdiń ózinde qala shetindegi órtti aýyzdyqtap jatyr. Bul elde 7 iri órt oqıǵasy tirkeldi, kem degende on shaqty eldi mekendi kóshirýge buıryq berildi.
Grek araldarynda aptap ystyqqa jel qosylyp, órtti sóndirý qıynǵa soqty. Bılik kez kelgen ýaqytta keıbir demalys oryndarynan týrısterdi evakýatsııalaý qajet bolýy múmkin ekenin basa aıtty.
Albanııada orman órtinen kem degende bir adam qaza tapty: polıtsııanyń málimetinshe, 80 jastaǵy er adam baý-baqshasynda ot jaqqan, biraq jalyn baqylaýsyz qalyp, aqyry tilsiz jaý birneshe aýyldy sharpyǵan.
Albanııada barlyǵy 30-ǵa jýyq orman órti tirkeldi. Olarmen kúresýge myńnan astam adam, onyń ishinde sarbazdar men eriktiler jumyldyryldy. Jaqyn jerde úlken oq-dári qoımasy ornalasyp, órt shyǵý qaýpi tónip turǵandyqtan, birneshe kent turǵynyn evakýatsııalaýǵa týra kelgen.
Ispanııada qazirdiń ózinde órtten kem degende eki adam qaza tapty, qyzyl jalyn myń gektardan astam orman men egistikti sharpyǵan. Osyǵan baılanysty birneshe myń adam evakýatsııalanýǵa májbúr boldy. Madrıd mańyndaǵy eń iri órtterdiń biri sársenbi kúni aýyzdyqtaldy. Polıtsııa ádeıi órteý kúdigimen birneshe adamdy qamaýǵa aldy. Boljamǵa sáıkes, túbekte 44 gradýsqa deıin ystyq bolady.
Portýgalııa bıligi kóptegen orman órti men aptap ystyqqa baılanysty búkil elde tótenshe aýa raıy jaǵdaıy týraly eskertý jasady. Jalyndy sóndirýge eki myńnan astam órt sóndirýshi jumyldyryldy. Demalys kúnderi Portýgalııanyń soltústiginde úsh órt oqıǵasy boldy.
Italııada Vezývıı baýraıyndaǵy iri órtke qarsy kúres jalǵasyp jatyr. Oqıǵa ótken jumada bolǵan. Tútin men jalyn aýmaǵy ǵaryshtan da kórinedi.
Buǵan deıin Túrkııanyń birqatar óńirinde tutanǵan orman órtimen kúres jalǵasyp jatqanyn jazǵan bolatynbyz.